Atualità
1,3 milions per la Cultura ladina
USP – La Cunsulta provinziela Ladina se à ancuntà per tò tres la dumandes de cuntribuc per la cultura ladinia. Danter lies, artisc' y istituzions che lëura per l mantenimënt y la cura dla cultura ladina vëniel tres l Assessorat provinziel ladin chëst ann de ndut dat inant 1.309.458 Euro.
126 dumandes de cuntribuc à giapà “lum vërda” da pert dla Cunsulta provinziela Ladina. “Sce pudon dé n aiut te 126 caji pona iel n sëni che te nosta valedes vëniel fat truep per mantenì nosta arpejon culturela ladina” se ncunforta l assessëur ladin Florian Mussner. Cun si terza senteda (ai 9 de lugio) à la Cunsulta Ladina pudù dé l bënsté sun la spartizion de duc i 605.000 Euro che ie chëst ann a desposizion dla Cunsulta. De ndut à la Cunsulta, metuda adum da cin persones, tëut tres 136 dumandes.
L majer capitul tol ite i cuntribuc per ativiteies dla lies y di artisć cun 395.000 Euro. Chësc capitul ie unì spartì su sun 78 lies y 14 artisć. De ndut fovel tlo unì mandà ite 98 dumandes.
La lies cultureles à uni tant nce de bujën de nvestimënc per mantenì si guanc, cumpré strumënc o fé ite vel toch te si local dla lia. Te chësc capitul iel chëst an unì udù dant cuntribuc per 190.000 Euro. De 32 dumandes à 30 giapà n bënsté positif dala Cunsulta.
Nce i chemuns giapa tres l Assessorat provinziel ladin aiuc per mantenì la cultura ladina. Per nvestimënc y ativiteies ie i 20.000 Euro a desposizion unì spartì su danter 4 dumandes che à giapà l bënsté.
Sëuraprò ala dumandes valutedes dala Cunsulta culturela, sustën l Assessorat provinziel Ladin chëst ann l Istitut Culturel Ladin Micurà de Rü cun 403.658 Euro. Chësc ie feter n terzo de duc i scioldi a desposizion. Per la publicazion dla Usc di Ladins vëniel da pert dla Provinzia de Bulsan dat 52.000 Euro. La publicazion de media te na rujeneda de mendranza ie dastramp ria da finanzië ajache l ne ie nia mesun vënder truepa copies. Per chisc caji y per proiec de educazion à l Assessorat ladin judà cun 60.000 Euro. Danter i cuntribuc che l Assessorat dà ora diretamënter per la cultura, prinzipalmënter trasmiscions tla televijion y tl radio, deberieda cun opres artistiches vëniel mo dat ora 188.800 Euro. Cumpedan adum duc i capituli sustën la Provinzia de Bulsan chëst ann la cultura ladina cun 1.309.458 Euro.
I mesuns finanziei per judé a mantenì la cultura ladina vën metui a desposizion dala Provinzia de Bulsan aldò dl pruporz y vën spartì su aldò dla dumandes che vën mandedes ite. La Cunsulta culturela ladina valutea aldò dl valor culturel y dla cumpëida dla persones che fej pert de na lia o de n proiet, la mesura dl cuntribut. Presidënt dla Cunsulta ie l assessëur Florian Mussner, che fajerà pona nce i decrec acioche possa unì paië ora i cuntribuc. Cumëmbri dla Cunsulta ie mplu Hubert Irsara da La Ila y Bruno Senoner de S.Crestina. Sciche esperc dl ciamp ie Lois Ellecosta da Al Plan y Hilda Sottara da S.Martin te Cunsulta. Scrivan ie Alexander Piccolruaz dl Ufize provinziel per la Cultura ladina.
Canche la lies, artisć y istituzions arà mandà ite la documentazion sun si spëises puderal unì paià ora i cuntribuc per mantenì la cultura ladina. Da nuef iel chëst ann che per cuntribuc de atività ordinera nchin a 3000 Euro, possa la lies dé ju la documentazion te na forma plu scëmpla. A chësta maniera an ulù smëndri l pëis burocratich per ulenteres che se dà ju per la cura y mantenimënt dla cultura ladina.
as
