Atualità
Trëi assessëures cun la lies di jëuni pra la mostra nterregiunela a Furtëza
USP – La mostra nterregiunela 2009 “Labirint::Lidëza” vel: chësc desmostra la gran cumpëida de vijitadëures che se da jù cun l argumënt dla lidëza. Ntan l fin dl’ena à i trëi assessëures provinziei ala cultura vijità la mostra deberieda cun feter otanta reprejentanc y ulenteres dla lies di jëuni tl Südtirol y dl Tirol.
Feter 80 culaburadëures dependënc y ulenteres dla lies di jëuni, spartii de de plu grupes à vijità la mostra tl furtin. Te si saluc à i assessëures provinziei ala cultura Sabina Kasslatter Mur, Christian Tommasini y Florian Mussner metù a cuer la mpurtanza de tel ancuntedes per n barat y n dialogh che ie de valor per dé forza ala cunvivënza y al spirt europeich. “La valivanza, l otimism, solidarietà, ntegrazion y lidëza ie de gran valores che te nosc tëmps ie de gran bujën. Iust chi che lëura tl mond di jëuni dëssa purté inant chisc valores.” nsci i trëi assessëures fajan referimënt a elemënc dla mostra.
La paladina dla mostra, cun si cuntenuc y si formes de espusizion à drët tucà i jëuni. La mostra che ie unida giaurida ai 9 de mei sun scumenciadiva dl Südtriol, Trentin y Tirol pieta a si vijitadëures na spersa de 14 mile metri cuadrac spartii te 86 pertes ulache l ie da udëi feter 200 opres d’ert y massaria da uni di. La mostra ie da udëi tl furtin de Furtëza, che se prejënta sciche n labirint ulache i vijitadëures possa ti ruvé plu daunij a capì l ideal dla lidëza.
as
