Atualità
Mussner ala conferënza internazionala sön l’acuisiziun dl terzo lingaz y le plurilinguism
USP - „Le lingaz é ince identité, cultura y incuntada“, à sotlinié l’Assessur por la scora y la cultura ladina Florian Mussner incö, ai 10 de setëmber, pro la daurida dla conferënza internazionala al’Université Lëdia de Balsan sön l’acuisiziun dl terzo lingaz y le plurilinguism. Incër 150 esperc s’à dè jö pro la conferënza te referac y simposiums cun l’aprendimënt dl terzo lingaz y le plurilinguism en general.
En chësc ann vëgn la conferënza “L3-Third Language Acquisition and Multilingualism”, che vëgn metüda a jì vigni dui agn, tignida a Balsan. Chësta conferënza é bele gnüda realisada tla Scozia, tla Svizera, tl’Irlanda, tl’Olanda y tl’Austria. Südtirol é dantadöt n post adatè por chësta conferënza, deache te chësta provinzia vîrel adöm trëi grups linguistics, à sotligné l’Assessur Mussner, che à rapresentè le Presidënt dla Provinzia pro la daurida dla conferënza. Te chësc contest à Mussner fat referimënt al secundo Statut de Autonomia che ti garantësc ai trëi grups linguistics te Südtirol de mantignì y svilupé so lingaz y süa cultura. Sambëgn é avisa la jënt de Südtirol coriosa da savëi cara che é la miù metoda por imparè i lingac y a chësta domanda pon dessigü ciafè na resposta pro la conferënza, à miné l’Assessur.
Pro la conferënza s’à esperć dè jö te referać plenars y te grups de laûr desvalies cun le plurilinguism y l’acuisiziun dl terzo lingaz. Al zënter dl interès él danter l’ater chisc temesc: la familia plurilinguala, les cultures plurilinguales, l’alfabetisaziun te de plü lingac, la politica linguistica te contesć plurilinguai, la neurolinguistica y la psicolinguistica en cunt de plurilinguism. La conferënza al’Université Lëdia de Balsan döra ćiamò ćina ai 12 de setëmber.
SAN
