Atualità
Les educadësses y i maestri ladins mët man l’ann de scora nü
USP - Le lingaz ladin é stè incö, ai 11 de setëmber, al zënter dl’inauguraziun dl ann de scora nü por i maestri y les educadësses dles scores y scolines ladines dla Val Badia y de Gherdëna. „Le lingaz é val’ deplü co ma na ligna de vocai cun n significat – le lingaz dla uma sostëgn l’identité y ô dì cultura“, à sotlinié l’Assessur por la scora ladina Florian Mussner.
Baié de plü lingac à n gran valur, deache an se fej spo plü saurì sön chësc monn, mo le lingaz dla uma à tres n valur particolar, à dit Mussner, che à fat referimënt al’importanza dl lingaz ladin tles scolines y tles scores. L’Assessur ti à audè ai maestri y ales educadësses döt le bun por le scomenciamënt dl ann de scora nü y tröp suzès pro so laûr tan important.
L’Intendënt Roland Verra à presentè l’intendënza ladina y sü sorvisc por i maestri y les educadësses. „I porvun da dè döt le sostëgn che ara va por l’insegnamënt y l’educaziun y de miorè tresfora nüsc sorvisc“, à alzè fora Verra. Implü é l’intendënza ladina tl laûr da laorè fora materiai didatics por i maestri. Inće por l’integraziun, y dantadöt tl ćiamp di lingac, déssel gnì dè n majer aiüt, à dit l’Intendënt Verra.
Le Professur Paul Videsott, a će dla Repartiziun ladina dla Facolté de Sciënzes dla Formaziun dl’Université Lëdia de Balsan, à tignì n referat sön le lingaz ladin, süa funziun y so valur tles scores de Gherdëna y dla Val Badia. Dla cornisc musicala s’à cruzié le cor di maestri dla Val Badia.
SAN
