Atualità
Dé dla Cultura Ladina ai 2 de otober a San Martin de Tor
En vëndres, ai 2 de otober, vëgnel tignì tl istitut cultural ladin "Micurà de Rü" a San Martin le "Dé dla cultura ladina". L’argomënt dl Dé da en chësc ann é: "La idea dla liberté te n tëmp che se müda (1809-2009)". Organisé vëgn le Dé dal assessorat por la Scora y Cultura Ladina.
Tl ann de comemoraziun 2009 se recorda i paîsc y i comuns dl Tirol storich di avenimënć dl 1809. Sot al moto "La storia s'incunta cun le dagnì" vëgnel porvè de cherié n lian danter le passè y le dagnì, danter la tradiziun y la modernité. Dales 17.00 saràl le Presidënt dla Junta Provinziala Luis Durnwalder y l'assessur por la scora y la cultura ladina Florian Mussner che dauriarà la manifestaziun. Al vëgn tignì dui referać: le prof. Roman Siebenrock jarà ite sön la importanza dla devoziun al Sacher Cör de Gejù dal mëteman dl 19ejim secul ćina al dedaincö, Albert Videsott, diretur dles scores altes da La Ila, deperpo presentarà la situaziun di ladins tles veres de liberaziun dl Tirol.
Incër les 19.00 saràl na mësa torona cun l'assessur Mussner, Moreno Kerer, diretur dl Istitut Cultural Ladin "Cesa de Jan", Hugo Valentin, presidënt dl Istitut Cultural Ladin "Micurà de Rü", y Albert Videsott. La mësa torona sön le valur de liberté te nosta sozieté vëgn moderada da Alexander Stuffer.
An po odëi la liberté te n gröm de manires. Liberté sciöche assistënza da pert dl stat (liberté dal bojëgn), o liberté politica (democrazia) o liberté personala, liberté de aziun y de dezijiun. Podunse ćiamò s’aspetè tla sozieté d’al dedaincö dales zitadines y dai zitadins che an sais da s’avëi sot a control y da se manajè instësc o é les porsones a öna, te n tëmp olache al crësc le bojëgn do na segurëza interiura, de azetè de maius limitaziuns?
USP
