Atualità
Criteries nueves per la valutazion a scola
USP – La Jonta provinziela à dat pro la diretives per la valutazion di sculeies dla scoles elementeres y mesanes dla Provinzia de Bulsan. A Chësta maniera iel unì metù a post l’ultima pert dla reforma per la scoles de ublianza, metan n drova la lege sun l nseniamënt. La regules nueves che ie unides dates pro reverda duc i aspec n cont dla valutazion de sculeies per la scoles de duta trëi grupes de rujeneda.
“Cun i criteries nueves per la valutazion ne sëurantol la Jonta provinziela nia me la diretives da Roma, ma la va inant cun l mëter n drova dla lege sun l nseniamënt cun si la diretives” nsci i assessëures ala scoles Kasslatter Mur y Mussner. I criteries dai pro regulamentea la cumpetënzes di cunsëies de nsenianc, di nsenianc singuli y di cunsëies de tlas.
N cont dla valutazion dl livel arjont dai sculeies y si miuramënc tla scoles elementeres y mesanes, iel unì dat pro la linea statela de valuté cun notes. Ma sëuraprò muessa ala fin de uni semester mo unì descrì l svilup dl sculé.
Da nuef iel che cun l finé dla scola elementera y dla scola mesana uniral sëurandat na zertificazion dla cumpetënzes. Chësta dëssa mustré su ai sculeies cun si genitores i fins de nseniamënt arjonc te uni materia y nsci nce l svilup dla persunalità dl sculé.
Tla scola elementera saral me te caji particuleres mesun de nia lascé passé l sculé. Autramënter iel per la scoles mesanes y scoles autes ulache i sculeies passa de tlas sce i ie positives te duta la materies y nce n cont de cumpurtamënt. Mplu muessa i sculeies dla mesana vester prejënc a almanco trëi cherc dl’ëures de nseniamënt per pudëi passé de tlas. Na valutazion negativa ie me mesun sce l sculé à ntan l ann de scola messù sté a cësa plu de chìndesc dis.
La materia religion mantën si pëis de plën sce l ne vëni nia fat dumanda spezifica da pert dla familia. Nce te chësta materia vën la valutazion fata cun notes. I nsenianc de religion à tla cunferënzes de valutazion l medemo pëis di autri.
La regulamentazion nueva reverda nce la valutazion de sculeies cun dificulteies de handicap, sculeies te na situazion de migrazion y nce per i ejams de conclujion.
as
