Atualità
Mussner anconta reprejentanc dla scolina
USP – La situazion mudeda di mëndri y dla families te nosc tëmps mpënia for deplù l’atività te scolina. Te n ancunteda cun l assessëur provinziel ladin Florian Mussner à reprejentantes dl personal pedagogich dla scolina tudëscia y ladina (LSKA) purtà dant ciunes che ie al mumënt la majera dificulteies per la educadësses per ti vester ala situazion.
I mëndri vën te chisc ultimi ani mandei plu da pitli ala scolina. I plu pitli à 2,5 ani canche i va ala scolina, i majer à 6 ani. Chësta gran defrënza de età tla grupes cumporta truepa esigënzes nueves che muessa unì manejedes dal’educadësses. Leprò se damandëssa la defrënta rujenedes tla scolines ladines y for plu fulestieres che ne cunësc nia nosta rujenedes, de plu personal.
Da pert dl assoziazion dl personal pedagogich tla scolines LSKA à Bärbl Riedmann y la reprejentanta ladina Helene Kerschbaumer l’ena passeda metù a cuer al assessëur Mussner che nce l cheder prufesciunel nuef tla Provinzia de Bulsan cumporta na sfida sëuraprò. Per l’assoziazion dla categuria prufescionala dla maestres y culaburadësses pedagogiches (LSKA) se tratela de jì inant a crì partner y culaburazions per pudëi ti vester ala trupa esigënzes.
“La families jëunes dal didancuei adrova for de plu l aiut y la cunsulënza dl’educadësses de scolina” à da si pert sorissà l assessëur Florian Mussner. La particularità dla scolina ladina a Helene Kerschbaumer sorissà auzan ora l ie nce caji ulache sun na grupa de scolina (25 mëndri) ne iel n valguni che ne ntënd y ne rajona nianca na parola de nosta trëi rujenedes. La situazion atuela te scolina ie nce carateriseda dal bujën dla cumenanza che l vënie pità l servisc de scolina domesdì. Chësc se damanda tlermënter plu ëures de lëur. Chëst ann d’ansciuda iel unì dat pro la ndicazions provinzieles nueves per la scolina ladina, diretives che se damanda gran prufescionalità dal’educadësses. “L lëur che vën fat te scolina muessa unì sciazà di per di ajache l mpëni che vën damandà ie grant. Ma la prufescionalità che vën damandeda dal’educadësses adrova nce n sustëni n cont de furmazion, cumpaniamënt y aiuc” à purtà dant l’ispetëura Edith Ploner.
“N cont dl’autonomia nueva dëssa la scolina se damandé respostes cuncretes dala politica” à dit Mussner. Aldò dl assessëur iel mpurtant che l vën fat nvestimënc tla furmazion nce te chësc tëmp che la va de sparanië.
Da pert dl ntendënt ala scola ladina Roland Verra iel unì damandà che l’educadësses renforzëies la rujeneda ladina tles scolines de Gherdëina. Dal’autra pert recunësc l ntendënt la valor dla scolina te nosc sistem de furmazion.
as
