Atualità

Scora / Cultura | 06.11.2009 | 10:41

Assessëures ai jëuni anconta la trëi cunsultes

USP – Da moinla dëssel unì curà de plu i proiec che tol ite duta la grupes de rujeneda. Chësc ie unit ora n juebia (5 nuvëmber) dal’ancunteda danter i assessëures ai jëuni Mussner, Kasslatter Mur y Tommasini cun i presidënc dla trëi cunsultes ai jëuni Peer, Stuflesser y Lazzarini. Sciche argumënt dl ann ie unì cris ora l fé pea di jëuni tl ciamp dla furmazion.

Da pert dla cunsulta tudëscia, taliana y ladina iel unì purtà dant ai assessëures provinziei ai jëuni de ulëi se mëter deberieda n argumënt dl ann. Per l prim ann iel unì cris ora l rujené pea di jëuni tl ciamp dla scola. La cunsultes ai jëuni ulëssa  lauré deberieda cun la cunsultes di sculeies per la trëi rujenedes. Te chësc mumënt vëniel laurà tla reforma dla scoles autes y l ie da udëi sce se muev nce velch n cont di cunsëies che dëssa rujené pea a tò dezijions, à dit Sabina Kasslatter Mur. De tel formes de pudëi rujené pea iel aldò dl assessëura nce debujën tla scolines, scoles de mujiga y tla scoles prufesciuneles.

La trëi cunsultes ai jëuni uel ti ani che vën lauré de plu deberieda y se judé ora.
„L ie mpurtan che i jëuni ladins, tudësc y taliani mëte nce a jì velch deberieda cun jëuni che vën da oradecà y che i chier nteresc deberieda“ à dit Florian Mussner. Nce per Kasslatter Mur dëssa l deberieda vester plu sterch che no chël che spartësc. „Ora de scola se pieta per l lëur cun i jëuni la puscibltà de dialogh danter la cultures“ à sorissà Christian Tommasini.
I assessëures y i presidënc dla cunsultes ie stai a una che tl daunì dëssel unì pità de plu ucajions per i jëuni de duta la grupes de rujeneda.

I jëuni à purtà dat i argumënc de majera mpurtanza che vën tratei te si cunsëies. „L tré ite jëuni tl’atività ulentera, la prevenzion dl estremism de man drëta y l lëur per i jëuni ti media ie i argumënt prinzipei dla cunsulta ladina“ nsci Patrick Stuflessser.
„Tla cunsulta tudëscia ti vëniel dat mpurtanza ala prevenzion de viulënza y estremism de man drëta. N se fej pensieres sun l lëur di ulenteres, l sustëni finanziel dl lëur per i jëuni y l svilup dl marcià dl lëur che porta for plu dificulteies ai jëuni“ à dit Michael Peer.
La furmazion di culaburadëures tla strutures per jëuni ie de mpurtanza per la cunsulta taliana, chësc per arjonjer che de plu jëuni lëure pea te chisc zëntri y che i devënte luegia de ancunteda danter la cultures, nsci Marco Lazzarini.

I presidënc dla cunsultes à mo rengrazià Mussner, Kasslatter Mur y Tommasini per si mpëni per i jëuni y per l bon sustëni da pert di Ufizies provinziei per i jëuni.

as

Galaria dales fotografies