Atualità
Premiazion y mostra per artisc' ladins a Bulsan
USP – Tla Galaria Prisma de Bulsan iel da udëi l’opres de artisc' ladins che à fat pea l cuncors scrit ora dala Repartizion ala Cultura ladina dla Provinzia de Bulsan. N vënderdi sëira (20 nuvëmber) iel unì giaurì chësta mostra n ucajion dla premiazion de Philipp Messner y Giancarlo Lamonaca che à venciù l pest per artisc’ ladins.
Per n artist ne iel nia tan saurì prejenté si opres a n majer publich, mo plu rie iel sce l artist vif te n pitl luech sciche tla valedes ladines. Tla Galaria Prisma de Bulsan iel nchin ai 5 de dezëmber da udëi l’opres che 11 artisć dla valedes ladines prejentedes per l cuncors provinziel per artisć ladins. “Te chisc tëmps de globalisazion iel debujën de puenc de culegamënt danter la grupes de rujeneda” à dit l assessëur Florian Mussner pra la giaurida dla mostra, n vënderdi sëira a Bulsan. De ndut iel stat 28 danter gherdëines, badioc y fascians che à fat pea per l pest provinziel per artisć ladins. La gran tradizion artistica ladina che tol ite l tradiziunel y l modern, muessa unì purtà danter n majer publich. “La mostra dla Galaria Prisma ie chisc dis na luegia de ancunteda per l dialogh y la descuscion sun l’opres di artisć ladins” à dit l assessëur ladin nvian particularmënter i artisć che ne ie nia ruvei dancà tl cuncors.
L gran nteres dla truepa jënt pra la giaurida dla mostra ie per l diretëur de repartizion Alexander Prinoth nce stat n sëni tler che l cuncors judà a mutivé nosc artisć ladins de jì inant sun si streda.
Tla medema sëira ie l artist Richard Agreiter unì numinà cumëmber de unëur dl “Südtiroler Künstlerbund”. La familia de Agreiter cun i genitores da S.Martin y Colfosch, fova ntan l’opzion jic a sté tl Böhmen. Richard Agreiter se à fat gran meric artistics a livel de Europa. Ël lascerà si arpejon al Museum Ladin y à nce fat na fundazion che scrijerà ora uni trëi ani n pest per scultëures ladins.
Argumënt dl pest provinziel per artisć ladins ie stat “Eroism: inier, incö, doman”, fajan referimënt ai 200 ani dala batalies de liberazion dl Tirol. Giancarlo Lamonaca de S. Martin mët ora doi chedri cun fotos dla stazion Nato a Schabs y dla caserma a San Ciana metudes nsëuralauter, mustran su n eroism mpustà da lassù ju. Philipp Messner de Urtijëi à fat na stëila dla libertà, te forma plastica, de mitel. La stëila tipica per americans y nce rusc, ududa sciche stëila che va su y che ie nce n avertimënt.
Isabell Pitscheider prejënta massaria da cësadafuech sorissan l’eroism chiet dla lëur de cësa. Bruno Walpoth à fat n “busto” che reprejentea n jëunn che ti va do a si anima. Arnold Holzkencht à fat n model de n podest cun l’idea che uni un possa nstës purvé ora la fazion de vester n eroe. Flavio Senoner à nstës fat mujiga cun si opres de lën fajan referimënt al eroism te na situazion caotica. Matthäus Kostner à metù la fotografies de 13 personajes mundiei sun na zedula da un Dollar y ti à dat l titul “One World”. Ivan Lardschneider à reprejentà la persona moderna che se destaca da si cë che l ne ie nia bon de purté. Walter Moroder à cun fotos de santes da mort auzà ora i eroes da uni di dla families. Peter Demetz à reprejentà na luegia per eroes che fej storia. Edmund Nagler à cun fotos nsëuralauter mustrà su mëndri sciche eroes che muessa se fé inant.
La mostra di artisć ladins tla Galaria Prisma, streda Weggenstein 12 a Bulsan, resta davierta nchin ai 5 de dezëmber. Nteressei possa ti cialé al’opres artistiches da merdi ala sada dala 10.00 ala 12.30 y dala 16.00 ala 19.00.
Do l cuncors artistich y l cuncors leterer al ann passà, ie la Repartizion ala Cultura Ladina dla Provinzia de Bulsan bele tl lëur de pensé a n cuncors nuef per mutivé y sustenì i ladins.
as
