Atualità
1,3 milions per la Cultura ladina tl 2009
USP – La Cunsulta provinziela ladina se à ancuntà n mierculdi 25 de nuvëmber per tò tres l’ultima pert dla dumandes de cuntribuc per la cultura ladina da chëst ann. De ndut vëniel tl 2009 tres l Assessorat provinziel ladin judà cun 1.359.458 Euro a lies, artic’ y istituzions che lëura y mantën la cultura ladina. Per l ann che vën an bele dat pro prioriteies nueves.
Tl ann 2010 uel la Cunsulta provinziela ladina dé n majer pëis al’ativiteies permez ai nvestimënc. “Ulon dé n majer pëis a chël che nosta jënt fej per la cultura ladina, chël nes sa plu mpurtant che no l avëi materiel dla lies” à dit l assessëur Florian Mussner.
Ntan chëst ann iel unì sperimentà na forma nueva per smendrì burocrazia per la lies cultureles ladines. Nce n auter ann ti pieta la Provinzia de Bulsan ala lies ladines de dé ju l rendicont di cuntribuc (nchin a 3.000 Euro) a na maniera plu scëmpla cun manco documënc da mandé ite. Do n tëmp de sperimentazion cun ativiteies cultureles talianes iel per l ann 2011 udù dant de slargë ora chësta forma cun manco burocrazia a duta la formes de cuntribuc culturei.
“I cuntribuc ie n aiut al’atività dla jënt tla valedes, perchël ulons nce tl daunì mantenì l prinzip de sussidiarietà ti lascian libertà ala lies n cont de crì ora manifestazions y cuntenuc” à dit l assessëur Mussner. Do la bona speriënza da chëst ann jirà i culaburadëures dl Ufize provinziel per la cultura ladina de jené inò ti luesc per pië do de persona la dumandes per cuntribuc culturei. Chësc servisc drët prijà pieta nce ucajion de stlarì cuestions tecniches diretamënter tla valeda. La dates unirà mo fates al savëi.
La Cunsulta provinziela ladina à chëst ann azetà 149 dumandes per n sustëni provinziel. “Chëst ann pudons dé ora n aiut finanziel te 149 caji y chësc desmostra che te nosta valedes iel jënt che fej truep per mantenì nosta arpejon culturela ladina” se ncunforta l assessëur ladin. Cun l’ultima ancunteda da chëst ann à la Cunsulta ladina pudù dé l bënsté sun la spartizion de 655.00 Euro. De ndut à la Cunsulta, metuda adum da cin persones, tëut tres 164 dumandes.
L majer capitul tol ite i cuntribuc per ativiteies dla lies y di artisć cun 445.000 Euro. Chësc capitul ie unì spartì su sun 132 lies y 14 artisć. La lies cultureles à uni tant nce de bujën de nvestimënc per mantenì si guanc, cumpré strumënc o per vel pez de mubilia. Te chësc capitul iel chëst an unì udù dant cuntribuc per 190.000 Euro. Chemuns y istituzions giapa chëst ann 20.000 Euro per mantenì la cultura ladina.
Sëuraprò ala dumandes valutedes dala Cunsulta culturela, sustën l Assessorat provinziel Ladin chëst ann l Istitut Culturel Ladin Micurà de Rü cun 403.658 Euro. Chësc ie feter n terzo de duc i scioldi a desposizion. Per la publicazion dla Usc di Ladins vëniel da pert dla Provinzia de Bulsan dat 52.000 Euro. La publicazion de media te na rujeneda de mendranza ie dastramp ria da finanzië ajache l ne ie nia mesun vënder truepa copies. Per chisc caji y per proiec de educazion à l Assessorat ladin judà cun 60.000 Euro. Danter i cuntribuc che l Assessorat dà ora diretamënter per la cultura, prinzipalmënter trasmiscions tla televijion y tl radio, deberieda cun opres artistiches vëniel mo dat ora 188.800 Euro. Cumpedan adum duc i capituli sustën la Provinzia de Bulsan chëst ann la cultura ladina cun 1.359.458 Euro.
as
