Scora / Cultura | 13.01.2010 | 13:07

Lëtres per cumpanië y sustenì genitores nueves

Usp – Per sustenì chiche devënta o ie da permò deventei genitores à la repartizion provinziela per la cultura laurà ora cudejiei de nfurmazion tlamei “Lëtres ai genitores”. L fin prinzipel de chësc servisc ie dlongia la nfurmazion te plu ciamps dl’educazion nce chël de mëter a cuer tan zities che i prim ani de vita per l svilup dla persona. L proiet ie unì prejentà ncuei danmesdì (13 jené) a Bulsan, dai assessëures provinziei Kasslatter Mur y Theiner.

“Cun la nascita de fantulins scumëncia per i genitores na capitul nuef dla vita cun truepa dumandes y ulache n se damanda nce coche se astiela d’autri. Mpede truepa leteratura pieta la “Lëtres ai genitores” na nfurmazion crissa ora y juda a miuré la cumpetënza educativa” à prejentà l assessëur Richard Theiner. Prejentei iel unì trëi cudejiei de feter 50 plates dedichei al aspité y la nascita, i prim mënsc de vita y l terzo cudejel per l segondo mez ann de vita. “Truepa ncëries y mestieres possen mparé danora, ma nia a fé i genitores. I cudejiei dëssa vester n aiut, ma acioche garate l’educazion iel dantaprima debujen de amor y fundamënt” à sorissà l’assessëur Kasslatter Mur, nstës oma de doi mutans.

Permez ala generazions passedes iel manco mutons per familia ma plu dumandes da pert di genitores. L fin di cudejiei ie perchël de sustenì i genitores y de ti mëter a cuer che ti prim ani de vita mpera la persona l 80% de si capaziteies. Ti cudejiei vëniel mplu dat inant te na forma lesiera cun truepa fotos y ilustrazions nfurmazion sun l raport de copia, sustëni finanziei, dumandes de dërt o canche l nasc n segondo mut. De utl ie nce la nfurmazions sun l’educazion te d’autra cultures, servijes, libri y adresses. La “Lëtres ai genitores” ie unides metudes adum n culaburazion cun truepa istituzions de educazion, esperc dl ciamp y tenian cont dl’analises dl’esperienza che n à fat te d’autri paejes cun de tei cudejiei.

Do i prim trëi cudejiei vëniel tla Repartizion provinziela ala Cultura bele laurà per njinië mo doi d’autri che dëssa cumpanië i genitores canche i mutons devënta majeri.

I  cudejiei, njeniëi tla rujeneda tudëscia y taliana, ie da giapé debant pra i servijes saniteres, servijes per la nascita o dutores dal’ëiles. Duc i genitores de mëndri nasciui do l prim de jené 2010 possa nce apusté debant la “Lëtres ai genitores” tl Ufize provinziel per i jëuni. Nfurmazions mplu y per apusté i cudejiei possen nce jì sun la plates internet www.provinz.bz.it/elternbriefe

as

Galaria dales fotografies

La lëtres ai genitori pieta n sustëni te si capitul de vita nuef.