Atualità
Cunsëi di ministri da pro la reforma dla scola auta: tla provinzia de Bulsan dl 2011
USP – L Cunsëi di ministri a Roma à ncuei (4 fauré) dat pro la reforma dla scola auta che dëssa bele jì n drova d’autonn sun dut l raion naziunel. Tla Provinzia de Bulsan jiral al'incontra permò n drova cun l ann de scola 2011/12. “Chësc spënjer dla reforma tlo da nëus nes da l tëmp dl’adaté a nosta situazion speziela” spiega i assessëures provinziei ala scola. Legrëza fej la puscibltà de na matura prufesciunela.
La Provinzia de Bulsan à cumpetënza secundera sun la scola, chël uel di che la possa mëter su regules aldò dla diretives che vën dates dant a livel naziunel. N uel nia fé n lëur de prëscia. “A una cun Roma scumencerons n ann do cun l mëter n drova la reforma dla scola, chësc per pudëi adaté miec nosc sistem scolastich” spiega l assessëures Florian Mussner, Sabina Kasslatter Mur y Christian Tommasini.
N à bele scumencià a anjenië la lege provinziela. Prima priorità ti vëniel dat a adaté la scola auta ai bujëns di jëuni. “La reforma ne possa nia nascer dal’istituzions, ma dala capaziteies y nteresc dla persones tuchedes” sorissea Mussner. Cun chësta reforma muda l sistem de furmazion per jëuni da 14 a 19 ani. Aldò dla diretives naziuneles dëssa la scola auta stizé sun trëi seves: l gymnasium, i istituc tecnics y la scoles prufesciuneles. A chësta maniera uniral smendrì la cumpëida de direzions. Al mumënt ons 13 sortes de gymnasium, 18 istituc tecnics y na lingia de scoles prufesciuneles.
La trëi seves dla scola dëssa vester valives a na maniera che n possa paredlé l livel de furmazion. Les dëssa duré cin ani y finé via cun l ejam de matura. “Gran plajëi nes fej la puscibltà de n ejam de matura do n cuinto ann de scola prufesciunela” sorissea i assessëures.
Per adaté la reforma dla scola auta aldò de na basa lergia y raideda do i bujëns dl daunì tl marcià dla stieres, tenirà i assessëures provinziei ala scoles tla proscima enes de plu ancuntedes cun la scoles, chemuns, partner soziei y genitores. “La se trata nce de na spartizion valiva dla sortes de scoles autes y tl medemo mumënt de tò demez scoles doples” dij i assessëures.
as
