Atualità
Reforma dla scoles autes: situazion tla valedes ladines
USP - La cumiscion per lauré ora la lege provinziela nueva sun la Reforma dla Scoles Autes y dla furmazion prufesciunela, metuda adum da reprejentanc dla Ntendënza Ladina, Taliana y Tudëscia y dla furmazion prufesciunela, sun ncëria di Assessëures ala Scola Mussner, Kasslatter Mur y Tommasini, se à ancuntà plu iedesc y ie a n bon pont per mëter dant per tëmp y ëura l documënt ai organns politics dla provinzia.
Da pert dla scoles ladines se tolen dant de seguré y renfurzé la vela de pusciblteies furmatives tla Val Badia y te Gherdëina, renfurzan nce la culaburazion cun la furmazion prufesciunela, dantaldut tl ciamp artistich-artejanel. N ulëssa garantì la formes inuvatives de istruzion per chël che reverda l Lizeo Linguistich y l Istitut Tecnic da La Ila, purtan inant nce la spezialisazion sozio-pedagogica. Dal’autra pert uelen ti dé n cheder segur ala Scola d’Ert Cademia tla forma de n Lizeo Artistich cun furmazions pratiches laite y sce l ie mesun nce cun na spezialisazion de mujiga sëuraprò. Per chël che reverda l ITC Raetia de Urtijëi iesen dla minonga che la spezialisazions ududes danora dala reforma naziunela curespuende defin ala pusciblteies furmatives da śën cun na spezialisazion economich-aziendela y una turistich-linguistica. La esperienzes sportives tl cheder dla autonomia dla scola dëssa ënghe pudëi jì inant per seguré l arjonjer dl titul de maduranza.
Pernanche l dessëni de lege sarà laurà ora defin, uniral nce metù a jì sentedes de nfurmazion cun i reprejentanc dl mond dla scola y dla sozietà tla valedes ladines.
usp
