Atualità

Scora / Cultura | 05.03.2010 | 10:12

Gran nteres ala premiera de „L secul ladin“

USP – L nteres dl publich ie stat majer che i urganisadëures se ëssa aspità: nsëira, 4 de merz, iel tl filmclub de Bulsan unì prejentà cun suzes l film sun i ladins ntan l 20esim secul. La se trata de film documenter pe mustré su l destin dla jënt ladina y per se de jù cun na pert scura dla storia ladina. Cun si prejënza à na gran cumpëida de jënt respundù cun entusiasm al nvit dl presidënt Durnwalder y dl assessëur ladin Mussner.

Ntan la doi gran vieres y dantaldut tres l opzion à la populazion ladina messù fé pea si piec tëmps. La prima viera mundiela à purtà batalies sun la dolomites, l fascism à spartì i ladins y la catastrofa dl’opzion à purtà melcuntentëza y desperazion. L film „L secul ladin“ mostra te doi pertes da 45 menuc testemunianzes de chëi tëmps y conta di capituli scures dla storia ladina. Capituli che vën zënza scialdi scutei via.

„Nosta jënt à abù ani de desperazion y ciarestia, l ne ie nia plu unì respetà le denità dla persona. L ie debujën de se dé jù cun chisc tëmps y de i dé inant ai jëuni“ à dit l assessëur Mussner pra la premiera, sorissan che „mustré su cie che ie stat uel di dé n cuntribut ala pesc te nosc tëmps“. L proiet de se jù cun la destin di ladins fajan n film ie stat tan grant che sëuraprò al Assessorat provinziel ladin ie nce la Region Trentin-Südtirol zapeda ite per l finanziamënt. La produzion ie unida fata te na culaburazion cun danter la Rai de Bulsan y la firma Produktion West.

Tla sala dl Filmclub colma de jënt à l presidënt de provinzia y region Luis Durnwalder metù a cuer la mpurtanza de cunëscer l destin dla generazions passedes, particularmënter di ladins che tres l Opzion ie ruvei te n raion de rujeneda fulestiera. „I Ladins l à abuda mo plu dura permez ai tudësc dl Südtirol y l film dëssa nce judé a valorisé l’artenienza dla jënt ladina“ à dit Durnwalder.

Dan la premiera nstëssa a Bulsan à i autores dl film Anita Lackenberger y Gerhard Mader cuntà che rujenan cun la jënt se à mo for mustrà l gran mel de chëi tëmps y la tëma. I testionesc di tëmps ntan la vieres ie tl lëur de murì ora y pra degun auter film ne ti à tan de persones desdì na testemunianza. Simbolicamënter per duc chëi che conta si storia tl film, à Angela Erlacher da La Pli de Mareo y Veronica Palla de Fodom pià do ciofs dal presidënt y dal assessëur provinziel y regiunel.

La RAI de Bulsan mostra ai 19 y 22 de merz l film tla rujeneda tudëscia „Das ladinische Jahrhundert“. Pra la premiera à l assessëur ladin cunedì che l unirà nce fat na verscion tla rujeneda ladina y dadedò ulessen nce nen fé una per ngleisc.