Atualità
N var de cualità per la scolina ladina
USP – 35 culaburadëures pedagogiches dla scolines ladines à nsëira (31 merz) pià do l diplom per avëi stlut ju cun suzes trëi ani de furmazion nterna. Cun la sëurandata tla Scolina Salieta a Urtijëi iel unì fat n var inant n cont de cualità dla scolina ladina. L valor de chësc mumënt ie unì sorissà dai respunsabli de duta la scola ladina y dl Istitut pedagogich ladin deberieda cun l assessëur ladin Florian Mussner.
Culaburadëures dla Val Badia y de Gherdëina se à tëut su l mpëni de fé na furmazion per se adaté a si cheder prufesciunel nuef. La lege provinziela vëija dant na majera culaburazion pedagogica cun l’educadësses y aiuc tla documentazion di vares de svilup di mëndri. “La culaburadëures à nce dunfrì tëmp liede y ie furnedes ntan la feries a fé i 14 modui de furmazion, ma l gran mpëni à purtà fruc che se lascia udëi tl lëur da uni di cun la pitla mutans y i pitli mutons” à sorissà l ispetëura Edith Ploner. La sozietà se muda, l’esigënzes crësc y la spanda de età di pitli ie ngrandida da 2,5 a 6 ani. Dut chësc se damanda n lëur cualificà te scolina. Educazion garata tres na bona relazion, nce cun sé nstësc. Ma la respunsabltà à duc chëi che tol pert al’educazion. Co se astilé cun tan na gran varietà muessa nce unì mparà. “L lëur che vën fat te scolina, la prima istituzion canche i pitli ruva ora de familia, ie de majer valor che trueps miena” à sorissà l assessëur Florian Mussner, “perchël iel nce drët dé mpurtanza canche tan de culaburadësses auza l livel dl servisc dla scolina te nosc luesc ladins”.
La furmazion cun Irmagrd Jaedike à bele purtà plu segurëza emoziunela tl lëur cun i pitli y la pitles, rafurzan nce la posizion dla culaburadëures tla culaburazion cun la families. “Te scolina possa i mëndri mparé y se n sté bën, chësc ie nce mpurtant per la families y perchël vala de lauré deberieda do l pensier de co-costruzion” à dit l ispetëura ala scolines ladines. “La furmazion stluta ju ie n var inant per respeté la normes provinzieles ma la ie dantaldut nce n var inant per miuré l servisc a bën dl mut y dla muta te si manieres de vester tan defrëntes cun si cumpetënzes ma nce cun si deblëzes” à sorissà la diretëura Hannelore Insam, che à nce cunstatà “Jan tla grupes é bele pudù udëi de gran vares inant n cont de cuscienza y prufesciunalità. L’educadësses prugramea l’ativiteies aldò de cie che les à mparà leprò, les sa plu avisa ciuldì fé ativiteies spezieles y se fej nce plu saurì a capì cumpurtamënc di mëndri”.
Sodesfazion y plajëi per chël che la 35 culaburadësses à arjont ie nce unì mustrà dal ntendënt ala scola ladina Roland Verra deberieda cun l diretëur dl Istitut Pedagogich Theodor Rifesser.
La culaburadëures che à stlut ju la furmazion
Alfreider Anita
Bauer Renate
Campei Heidi
Canins Martina
Costabiei Miriam Esther
Dapoz Cristina
Ellecosta Anneliese
Ellecosta Teresa
Ferdigg Christine
Fontanella Valentina
Insam Dagmar
Insam Ester
Irsara Margareth
Konrater Maria Teresa
Kostner Sabine
Nagler Consolata
Nagler Rosa Lucia
Perathoner Elisabeth
Perathoner Ester
Perathoner Karin
Pezzei Caterina
Pezzei Monica
Piazza Christa
Quitta Evelyn
Riffeser Patrizia
Rigo Manuela
Rubatscher Elisabeth
Runggaldier Rosmarie
Runggaldier Valeria
Senoner Patrizia
Senoner Rosa Anna
Tavella Ilse
Trebo Marta Maria
Valentini Martina
Vittur Marta
as
