Atualità
Jonta provinziela à dat pro l program per junënza ladina
USP – La Jonta provinziela à dat pro l program 2010 per sustenì l lëur per y cun la junanza tla valedes ladines. Sun pruposta dl assessëur ladin Florian Mussner iel unì dat pro de sustenì l’urganisazions che lëura per y cun jëuni y jëunes, y l’atività che l Ufize provinziel fej a bën dla junanza, nce ladina.
L Ufize provinziel per y cun la junanza pieta na lingia de scumenciadives a bën de jëuni y jëunes de duta la grupes de rujeneda. L fin prinzipel ie de miuré la cualità dl lëur y de mëter a jì cuntac cun d’autra strutures sozieles. L vën pità n program culturel de chël che grupes ti luesc possa se nuzé fajan unì adalerch referënc tres l ufize a Bulsan. Ntan l ultima ena de auril fajerà culaburadëures de istituzions per jëuni n viac de studi per udëi co che la ti va ai jëuni dl’Albania. “Mparan a cunëscer la vita di jëuni ilo juda nce a capì miec chëi che vën pona a viver tlo da nëus” spiega Wilma Runggaldier dl Ufize provinziel. Nce chësc sesto viac de studi vën metù a jì deberiëda dala trëi grupes de rujeneda. “On udù che tel esperienzes ie de gran utl per miuré i cuntac y la culaburazion” sorissea Runggaldier.L’ ativiteies dl Ufize lëur per y cun la junëza dates pro va dal cudejel di programs per la feries da instà, ala zaita “zb”, ala rë de cuntac per jëuni che uel fé esperienzes oradecà, ti sté do ala Cunsulta Provinziela de jëuni/jëunes, sumënciadives de pedagogia sessuela, furmazion politica, l cuncors de rujené tl publich y mo truep d’auter. N culaburazion cun Radio Gherdëina y la Rai Ladina iel prugramà de ti jì plu sot al argumënt di media nueves.
L’ativiteies per jëuni y jëunes che vën pitedes dal’urganisazions ti luesc à debujën de n sustëni publich. Tl program anuel per la junanza ladina iel perchël nce udù dant de judé a curì la spëises curëntes, seguran a chësta maniera prufescionalità tla gestion.
Da pert dla Provinzia uniral per l 2010 nce sustenì ativiteies a proiet, che dëssa avëi carater inuvativ, vester a tëmp determinà y destinedes a na maniera tlera a vel grupes de referimënt y ulache l unirà dopro nce fat na valutazion finela. L program provinziel de sustëni tol nce ite scumenciadives straurdineres che à valor particuler per la lies. Per arjonjer mo na miëura cualità tl lëur per y cun la junanza ti luesc ladins juda la Provinzia nce a finanzië furmazion per chi che se da ca y lëura per jëuni y jëunes.
De plu urganisazions per la junanza a livel provinziel, sciche per ejëmpl l telefonn per jëuni y jëunes “Young+Direct”, giapa nce n finanziamënt tres l ufize Provinziel.
Tla doi valedes ladines vëniel cialà de abiné locai ulache l possa unì fat de uni sort de ativiteies, ulache jëuni y jëunes giapa na si lerch per dé esprescion a si creatività culturela y l sté deberieda. “Chël di locai per jëuni ie n lëur che se damanda suvënz tratatives longes che va nce sëura l program anuel ora” spiega Wilma Runggaldier.
as
