Atualità
Mussner, Kasslatter Mur y Tommasini per l di nternaziunel dl liber
USP – Se dediché ai libri. Chësc ie chël che i trëi assessëures provinziei ala cultura mët a cuer a duc i zitadins, dantaprima ai jëuni, n ucajion dl di nternaziunela dl liber, de (duman) 23 auril. I libri ie nce de mpurtanza tl mond di media nueves, per dé inant savëi, speriënzes, cultura y rujeneda, à detlarà i assessëures.
Mussner, Kasslatter Mur y Tommasini nvieia duc i zitadins, l plu mo jëuni, de liejer y de tò su a chësta maniera mpulsc y savëi. “Tla sozietà carateriseda da nfurmazion à l liber daniëura na funzion de basa, ajache l sustën l svilup dla cultura y dla sozietà” sorissea i assessëures. La pascion per i libri possa bele unì descededa dai mëndri: cun chësc fin iel nce unì metù a jì la scumenciadiva dl “Bookstart” ulache genitores giapa n pachetl de libri da liejer dant.
“Per na mendranza ie l liber mo de majera mpurtanza” sorissea Florian Mussner, “libri ie n mesun acioche la rujeneda sëuraviv y ne vënie nia desminceda”. Tla valedes ladines vëniel uni ann dat ora da 30 a 35 libri, na cumpëida che, aldò l assessëur, fej unëur ai ladins. “Libri juda nce l cuntat danter la grupes de rujeneda” dij Mussner fajan referimënt ai libri che vën adurvei tla scoles ladines, scric te trëi rujenedes.
“Liejer ie mpurtant per eduché zitadins respunsabli y atives, ajache chiche liej truep à n majer savëi, plu creatività y pusciblteies” sorissea Tommasini.
Libri ie de gran mpurtanza per l svilup culturel, perchël sustën i assessëures l liejer. De valor ie a liejer deberieda te familia, ajache i mutons vën mutivei a liejer, l sustën la cumpetënza de rujeneda y miurea nce la pusciblteies de furmazion. “Tres la truepa biblioteches che fej nce de bela azions, an tla Provinzia de Bulsan bele arjont na bona cultura dl liejer” dij Kasslatter Mur.
as
