Scora / Cultura | 20.08.2010 | 11:07

Ciantarines „Ganes“ fej pea l proiet „Ladins tl monn“

USP – Les trëi ciantarines da La Val, cunesciudes sciche la grupa “Ganes” vif y lëura ti Paejes tudësc y tl’Austria. Per se tenì n cuntat cun la jënt de cësa y mparé a cunëscer d’autri ladins che ie oradecà fejeles pea l proiet dla plata internet „Ladins tl monn“. L assessëur provinziel Florian Mussner à n sëira (19 agost) ancuntà la “Ganes” pra si cunzert tl ciastel Trauttmansdorff a Maran.

La mujiga de Maria Moling, Marlene Schuen y Elisabeth Schuen ie zënza cunfins: si gran suzes cun la cianties ladines nce pra n publich de autra rujeneda les fej da ambasciadësses dla mendranza ladina. L assessëur provinziel Mussner à pra l cunzert ti verzons dl ciastel Trauttmansdorff laudà la ciantarines jëunes per si suzes les rengrazian nce per si cuntribut ala rujeneda y cultura ladina. La streda dla mujiga à purtà la ciantarines da La Val a Minca, Salzburg y Klagenfurt. L ncrëscer da cësa y dai luesc ladins se pèreles te chëla che les ie zapedes ite tla cumunità di “Ladins dl monn”. N proiet nasciù dan doi ani sun scumenciadiva dl Assessorat provinziel ladin cun l fin de vester n mesun per nvië via cuntac danter ladins che ie oradecà y nce cun la jënt ti luesc ladins. “Sun ‘Ladins tl monn’ sons ruveda n cuntat cun d’autri ladins che ie jic a sté ora de si valeda y é pudù mparé a cunëscer coche ëi se abina si streda ora dla Ladinia” à dit Marlene Schuen a Maran.

Per l’ultima produzion dal titul “Rai de sorëdl” à les “Ganes” scrit 14 cianties tla rujeneda ladina. Cun si bela ujes porta Maria, Marlene y Elisabeth inant l’armunia dl sonn dla rujeneda. “L fej plajëi che la ciantarines de suzes se nuzea dla plataforma Ladins tl monn, uluda propi per dé n sustëni a chëi ie jic a viver dalonc da si ncësa” à dit Florian Mussner. La plata internet www.ladinstlmonn.org ie nce n mesun per mparé a se cunëscer, se baraté ora esperienzes, jì a crì nfurmazions y se judé un cun l’auter. Chësc sentimënt de liam y unità ti da forza y mantën la cuscienza ladina. “Te n mond for plu globalisà chier la persona si ravises per nia jì sot te n sistem che porta a for na majera uniformità” à dit Mussner.

I cumëmbri dl proiet Ladins tl monn ie n gran pert jic a viver te paejes dl’Europa sciche l Deutschland, la Svizra, l’Austria, l Belgio, la Spagna, l Portogallo, la Gran Bretagna, Olanda, Svezia y Norvegia. Di 76 ladins sun la plataforma ne iel nce ti USA, Canada, Brasil, Porto Rico, Argentina, Messico y Chile. Singuli ladins che à abinà cuntac tres „Ladins tl monn“ vif tl’Asia (Giappone), Australia y Africa.

as

Galaria dales fotografies

Marlene Schuen, Maria Moling y Elisabeth Schuen, ambasciadësses ladines tl mond dla mujiga, cun l assessëur Florian Mussner ti verzons Trauttmansdorff;