Atualità
Diretëures ladins ti Grijons per curé cuntac de scola
USP – Na delegazion di diretëures dla scoles ladins cun i respunsabli dl’istituzions de scola à te n viac de furmazion ti Grijons pudù mparé dal’esperienzes di jurmans tla Svizra. L fin dla scumenciadiva dl ntendënt ladin Roland Verra, ie stat de studië la situazion educativa, culturela y soziela dla mendranza rumancia tl Canton Cuera (Chur).
La delegazion de Diretëures dla scolines y scoles ladines, y de respunsabli dla Ntendënza y dl Istitut Pedagogich ie jita dai 22 ai 24 de setëmber ti Grijons. Te n’ancunteda cun i respunsabli dla scola auta pedagogica di Grijons iel unì purtà dant la situazion dla rujenedes y dla scola tl Canton Grijon y daldò iel mo stat mesun de jì ite tla pusciblteies dla furmazion dl personal nseniant, ala lum dla formes defrëntes de urdenamënt scolastich te chël raion. L ie stat nteressant ntënder coche n anjenià ca i nsenianc, tenian cont che l urdenamënt scolastich n cont dla rujenedes possa mudé da chemun a chemun, a na maniera che vel’ scoles ie defin rumances cun l tudësch coche segondo lingaz, vel’ scoles paritetiches rumanc-tudësces y vel’autres tudësces cun mé n valgun’ëura de rumanc.
Chël che ie unì ora dala descuscion a na maniera drët tlera ie che, aldò dl prufessëur Conradi dla scola auta pedagogica, al bastà te cër luesc coche a Bergün mudé l sistem de scola da Grijon a Tudësch per fé scumparì l Rumanc te mé una na generazion.
L ie nce unì lecurdà la culaburazion che ie bele śën danter la facultà de scienzes dla furmazion a Persenon y la scola auta pedagogica de Cuera, cun barac de studënc che fej n stage tla autra realtà ladina.
La delegazion ie pona jita a se cialé l museum retich che à dat n cheder drët tler dla situazion storica y soziela di Grijons. Daldò an vijità la sënta dla televijion y dl radio rumanc, ulache l ie stat mesun udëi coche funziunea n prugram de dut l di de radio per rumanc y ulache n à pudù cunstaté l aut livel de dotazions y de prufesciunalità di media rumances.
Te na vijita ala scolina y ala scola primara de Trin, paesc puech de zes da Cuera, à la delegazion mparà sun l ciamp coche l ie mesun mëter a jì n sistem bilingual rumanc-tudësch ënghe te n paesc ulache l Rumanc vën mé plu rujenà da na mendranza di abitanc. La mprescion che la delegazion se à fat ie chëla de nsenianc che se prova dassënn te na situazion scialdi cumplicheda y de na bona preparazion prufesciunela dl personal educatif che possa se jué de na didatica moderna y de mesuns de istruzion interatives y creatives.
La culaburazion danter la scoles ladines dla Provinzia de Bulsan y chëles rumances dëssa jì inant tl nteres dl svilup dla scoles dla mendranzes, chësc ie stat la audanza che ie unida fata da tramedoi pertes.
usp
