Scora / Cultura | 22.10.2010 | 16:11

Di dla Cultura Ladina gëura vijoins sun i media de mendranza

USP - L Di dla Cultura Ladina, ncuei (22 utober) a Bulsan à giaurì vijions sun n svilup di media ladins, udan n gran potenzial tla culaburazion. L presidënt dla provinzia Durnwalder y l assessëur Mussner à sorissà l gran valor di media per la mendranzes y per la rujeneda nstëssa. L publich de bela cumpëida à respundù cun truep nteres ala scumenciadiva dl Ufize provinziel per la Cultura Ladina.

La comunicazion mediatica ie cun la nueva pusciblteies digiteles ruveda te na fasa de mudazion, perchël ie chësc l drë mumënt per se de ju cun l svilup di massmedia de mendranza. “L ie debujën de renuvamënt y de se adaté ai tëmps” à sorissà Luis Dunwalder. Che i media à na mpurtanza de basa per la mendranzes à l presidënt nce sotrissà fajan referimënt ala pesc tl’Europa, cuntinënt de mendranzes: “la mendranzes muessa nstësses comuniché y rujené di per di de si problems y si identità, d’autri ne l fajerà nia per ëiles”.

De prima persona pudù rujené l assessëur ladin: “I media de mendranza da forza ala identità, i sustën l svilup y ie tl medemo tëmp nce n porta de vieres de dut l mont”. L daunì di media vëija l assessëur tla inuvazion, tl unì ora de vedli modiei y de mëter a jì, n culaburazion cun d’autra mendranzes, na rë che dà sustëni y juda a mantenì la identiteies.

N model per l svilup di media de mendranza vëja Mariano Tschuor, diretëur dla Radio y Televijon Rumancia tl proiet “Content Rumanc”. De dut l lëur di media ie me l 20% spezifich per la singula redazion de n radio, zaita o televijion. Duta l’autra pert pudëssa unì cureda da na sëula redazion zentrela. “Cun i tëmps che se muda vala de pensé danora, scenó se tol ite la storia” à dit Tschuor. Do chësc prinzip uelen nce mëter a jì l proiet “Las-Alps-infoteca”. La mira ie na rë mediala per duta l’Elpes, sun chëla che la redazions possa se baraté ora la nutizies. La rujenedes dëssa vester n veicul y nia n rëm. Sun chësc proiet vëniel ai 12 y 13 de nuvëmber metù a jì n cunvëni a Curia.

Per ressolver l problem dla puecia lerch de trasmiscion per la RAI Ladina à l vizediretëur de RAI 3 Ennio Chiodi fat la pruposta de se nuzé dl sistem nuef dla trasmiscion digitela. Truepa ëura al di vëniel sun l RAI 3 y RAI 3 bis (per la region) mustrà l medemo program. “La mendranza ladina y tudëscia pudëssa se nuzé de chësc tëmp de trasmiscion” à detlarà Chiodi.

L di dla Cultura, cun na mëisa de descuscion à dat mpulsc y giaurì pruspetives de urientamënt. “Cun la partezipazion y i resultac che l Di dla Cultura Ladina à purtà ons arjont l fin de chësta scumenciadiva” à dit Alexander Prinoth diretëur dla repartizion per la Cultura Ladina.

as

Galaria dales fotografies

L pubich à mustrà truep nteres per l Di dla Cultura Ladina. (foto USP/Pertl)

“Zënza i media ladins ne à nosta rujeneda nia n daunì”: Florian Mussner pra l Di dla Cultura Ladina. (foto USP/Pertl)

Downloads