Atualità
Livel dla rujenedes di sculeies ladins: prejentazion ai 12 de nuvëmber
USP - Tla scoles mesanes ladines ie unì fat n’evaluazion linguistica te chëla che l ie unì analisà la cumpetënza dla rujenedes di sculeies dla terza tlasses, la paredlan a sculeies de rujeneda tudëscia y taliana. I resultac laurei ora deberieda cun esperc dl’Università vën publichei te n pitl liber, te trëi rujenedes, che unirà prejentà n vënderdi ai 12 de nuvëmber tl’Università a Persenon.
L Servisc de evaluazion dla scoles ladines fat na nrescida te defrënta scoles mesanes te Gherdëina y tla Val Badia n cont dla cumpetënza linguistica. L ie unì analisà la proves scrites d’ejam di sculeies de terza tlas. Chisc lëures ie nce unic paredlei cun sculeies de rujeneda tudëscia a Tluses y taliana dla scola “Dante Alighieri” de Bulsan. “I resultac de chësta analisa ie de utl per l urientamënt dl nseniamënt dla rujenedes tla scoles ladines” spiega Rosmarie Mussner dl Servisc de evaluazion.
L’evaluazion ie unida fata a livel scientifich cun la culaburazion dla pruf.a Rita Franceschini dl Zënter de cumpetënza linguistica dl’Università de Bulsan y l pruf. Pasquale Della Rosa dl’Università Vita-Salute San Raffaele a Milan.
Pra la prejentazion dl pitl liber saral dlongia la doi prufessëures y nce l Presidënt dl Cumité per l’evaluazion dla scoles ladines Lois Ellecosta. Dopro uniral prejentà n curt i resultac dla nrescida che Manfred Gross (Scola Auta de Pedagogia dal Grischun) à fat te n valguna scoles elementeres di Grijons.
L pitl liber di resultac dl’analisa linguistica de sculeies scoles mesanes unirà prejentà
y n vënderdi ai 12 de nuvëmber
dala 14.30 tl prim partimënt (local 1.14) dl’Università a Persenon,
i reprejentanc di media, culaburadëures dla scoles y duc i nteressei i nviei ala prejentazion.
as
