Atualità
Ancunteda dl minister belga Oliver Paasch cun i assessëures Mussner y Kasslatter Mur
USP - N barat de esperienza y de ideies n cont dla furmazion: chësc ie stat l argumënt zentrel dl'ancunteda dl minister belga Oliver Paasch cun i assessëures Provinziei Florian Mussner y Sabina Kasslatter Mur (inier) ai 12 de jené a Bulsan.
Oliver Paasch ie minister per la scola, furmazion y ocupazion dla „Deutsche Gemeinschaft“ tl Belgio. Si vijita de chisc dis tla provinzia de Bulsan à dat ucajion de rujené de paraleles ala situazion de mendranza di ladins. L'autonomia dla cumunità tudëscia tl Belgio se lascia nce paredlé cun la grupa de rujeneda ladina davia che tramedoi realiteies fej pert dl cunsëi dla regions tl Parlamënt d'Europa. Te n tëmp de globalisazion à chësc cunsëi n gran valor per la mendranzes ajache l tën cont y sorissea la mpurtanza de fé viver la mendranzes etniches.
Sëuraprò ala mpurtanza dla furmazion cun la funzion zentrela di nsenianc, à assessëures nce tratà aspec che reverda strutures adatedes per n nseniamënt inuvatif che tën cont dl daunì. Tl'ancunteda dl minister Paasch cun Mussner y Kasslatter Mur iel uni rujenà dl bujën de pusciblteies nueves per finanzië strutures de scola te tëmps de manco mesuns publics.
Argumënt prinzipel tratà cun l’assessëura Sabina Kasslatter Mur ie stat la culaburazion tl ciamp dla furmazion. I cuntac cun la Comunità Tudëscia tl Belgoio fova bele unic nviei via ti ani 90. Te chësc mumënt vëniel laurà a na rë de cuntac „comenius“ che vën coordinà dal minister dla Comunità Tudëscia cun l Istitut pedagogich sciche partner. Argumënt tratà che ti stà a cuer al’assessëur ie nce l sustëni dl liejer y mparé rujenedes. „Nëus ti cialon ala Comunità Tudëscia ajache ëi à de gran cumpetënzes tla furmazion, ëi cëla a nëus ajache on de miëura pusciblteies finanzieres“ a dit Kasslatter Mur.
L cuntat cun l minister Oliver Paasch ova Mussner bele abù de lugio dl ann passà canche l fova stat a Eupen tl Belgio sun nvit dl Presidënt di ministri Karl-Heinz-Lambertz. „Teniron inant i cuntac cun la comunità tudëscia tl Belgio y susteniron n bon barat de esperienzes“ à dit Mussner do l'ancunteda.
as
