Atualità
Scola ladina: regulamentazion nueva per la proves INVALSI
USP - l Ntendënt dla scoles ladines Roland Verra y l diretëur dl INVALSI Dino Cristianini à arjont n’acurdanza sun la proves de cumpetënza per i sculeies dla scola ladina. La proves unirà chëst ann fates ala fin dla scola elementera y dla scola mesana.
Tla sënta dl istitut naziunel per la valutazion dla scoles INVALSI a Frascati (Roma) iel ai 2 de fauré unì fat ora che la proves de talian y de conc ududes danora dal Ministero dla Istruzion unirà me fates tla cuinta tlasses dla scoles elementeres y pra l ejam de terza mesana. La regulamentazion nueva che reverda la scoles ladines unirà bele metuda n drova ntan chësc ann de scola.
Tl ann de scola che vën, 2011-12, uniral sëuraprò mo fat n tel test tla segonda tlas dla scola auta. Tenian cont dl model paritetich dla scola ladina, uniral fat la prova de conc per tudësch. Per curespuender ala situazion particulera de nosta scola, uniral fat ora cun l Ministero dla Istruzion la puscibltà de adurvé na scela de valutazion adateda per nosc sculeies per chël che reverda la votazions tl cheder dl ejam de terza mesana.
Aldò dla usservazions dla Ispetëura dla scoles ladines Rosmarie Crazzolara, prejënta ala senteda, iel massa abenëura fé chësta proves bele tla segonda tlas dla scola elementera, ajache l prozes de alfabetisazion se damanda tëmps plu lonc per pudëi fé n test da cunfrunté a livel de cunescënza dl talian cun autra pertes dla Talia.
L test tla prima scola mesana ne unirà ënghe nia fat, davia che n ie a una dl fé tla cuinta elementera.
Cun chësta acurdanza speren de pudëi ressolver l problem che ie unì usservà ti ani passei de na valutazion dl ejam de terza mesana massa cumplicheda y che se pertendova massa proves scrites da nosc sculeies- nscì l ntendënt Roland Verra.
usp
