Atualità
La Cunsulta à azetà prima dumandes de sustëni ala cultura ladina
USP – Te si prima senteda dl ann à la Cunsulta provinziela per la cultura ladina tëut tres de plu dumandes che ti ani passei. Feter duta la 111 dumandes ie unides azetedes y nsci puderal unì fat l decret dla pert dl assessëur provinziel ladin per paië ora i cuntribuc. Te chësta prima pert de dumandes azetedes se tratel de cuntribuc per na soma de 391.000 euro.
La truepa dumandes per n cuntribut provinziel tl ciamp dla cultura ladina à mpenià tant che duta la prima senteda dla Cunsulta, stata n juebia ai 17 de fauré. Cun 111 dumandes nen fovel chëst ann 22% de plu permez ala prima senteda dal ann passà. Lies che fej atività tl ciamp dla cultura ladina y artisć dla valedes ladines à mandà ite 90 dumandes de sustëni. La dumandes de cuntribuc per nvestimënc possa mo unì fates ti proscimi mënsc y nsci nen fovel de chëstes ntant 21. I cumëmbri dla Cunsulta culturela ie stai a una de azeté de ndut 103 dumandes. Me singula dumandes ie unides spëntes ala proscima senteda per les valuté miec. Per ativiteies dla lies y artisć iel unì udù dant cuntribuc per na soma de 309.000 euro. La prima pert de cuntribuc per nvestimënc azetei fej ora na soma de 82.000 euro.
La priorità di cuntribuc a sustëni dla cultura ladina ie mo n iede unida renfurzeda per l’ativiteies dla lies. “A chësta maniera ons nce dat resposta ala majera cumpëida de lies che à chëst ann fat dumanda. Tlo ons udù che l ie nce truep jëuni che se da ca per fé atività culturela ladina y chësc ie drët n bon sëni” sorissea l assessëur Florian Mussser. La mo majera priorità per ativiteies dla lies ie nce n sëni de recunescënza da pert dla Cunsulta culturela per duc i ladins che se dà ca tl ulentariat. “Tl ann europeich dl ulentariat ulons nce a chësta maniera valorisé chël che la lies fej per mantenì y curé nosta mendranza ladina” dij l assessëur provinziel ladin.
Dlongia la dumandes per cuntribuc provinziei an tla senteda dla cunsulta nce scumencià a traté l Di dl Cultura Ladina che n ulëssa chëst ann mëter a jì per la fin de setëmber.
Cunsulta culturela ladina à 5 cumëmbri. Do lege ie l assessëur ladin, Florian Mussner, presidënt de chësta cumiscion. Sun pruposta dla lies cultureles fej pert Hubert Irsara da La Ila y Bruno Senoner de S.Cristina. Sciche esperc dl ciamp ie Lois Ellecosta da Al Plan y Hilda Sottara da S.Martin unic numinei te cunsulta. L lëur da scrivan se à sëurantëut Alexander Piccolruaz de Corvara, che lëura tl Ufize provinziel per la Cultura ladina.
as
