Atualità
Sculeies dla mesanes ai 24 y 25 tl Istitut tecnich a Urtijëi
USP – I sculeies che finerà chëst ann la scoles mesanes de Gherdëina possa n juebia y vënderdi fé pea n di de esperienza tl istitut tecnich Raetia a Urtijëi. Mpede n di tlassich de porta davierta vëniel a chësta maniera prejentà la scola auta paritetica te na forma spezifica y adateda per i sculeies dla valeda.
Fé pea y purvé n di de scola tl istitut tecnich economich, mparan a cunëscer la pert aministrativa, la sezion dla rujenedes y l program spezifich per sculeies che fej sport. - Chësc ie l pensier zentrel di doi dis de workshop che l vën ai 24 y 25 de fauré pità ai sculeies dla scoles mesanes. I sculeies dla terza tlasses dla scoles mesanes de Gherdëina puderà te pitla grupes da 8-10 persones fé pea l nseniamënt tla tlasses. Bele danora ai pudù crì ora la lezions che ti nteressea de plu. “Cun chësta forma nueva ulons pité ucajion a chëi dla mesana che i possa se fé n cheder drët realistich co che la ie a jì a scola tlo da nëus” spiega l diretëur Bruno Senoner.
La scoles autes a Urtijëi y a La Ila pieta la sëula ucajion de jì inant cun l nseniamënt paritetich do la mesana zënza lascé do de mparé l tudësch o l talian. Cun la reforma dla scola auta uniral te chësta scoles autes nce nsenià doi ëura de ladin al’ena.
N juebia ai 24 de fauré jirà i sculeies dla scola mesana de Urtijëi a purvé n di tl istitut tecnich Raetia, l di do, ai 25, ti vëniel dat la medema puscibltà ai sculeies de S.Cristina y Sëlva.
Cun l jì n drova dla reforma dla scola auta, de setëmber 2011, muda l inuem y la scola Raetia se tlamerà Istitut tecnich economich. Ma i cuntenuc de nseniamënt resterà feter i medemi. L vën pità doi sezions: una dedicheda al’aministrazion, finanza y marketing, l’autra al turism. Aldò dla pusciblteies dl’autonomia scolastica vëniel sciche bele ti ani passei, nce pità n program speziel per i sculeies che fej sport.
Sculeies che ulëssa de setëmber scumencé l’istitut tecnich economich a Urtijëi possa sce scrì ite nchin ala fin de merz tla direzion (tel. 0471 796296). Nfurmazion n plù iel nce da abiné sun la plates www.schule.provinz.bz.it/hob-stulrich tl internet.
as
