Atualità
10 ani de ntegrazion scolastica cun de bela arjontes
USP – “La ntegrazion de sculeies cun dificulteies garata tres na culaburazion de de plu partner che se tën n cuntat”: cun chësc prinzip de lëur possa la grupa de lëur per ntegrazion scolastica cialé de reviers a 10 ani lëur fat n culaburazion. L prinzip de lëur ie chël de na coordinazion danter la istituzions per arjonjer na bona ntegrazion tla scolines y scoles de duta trëi grupes de rujeneda.
L lëur de sustenì la ntegrazion de sculeies y purté inant l model dla scola inclusia ova la la trëi Ntendënzes, la furmazion prufesciunela, i servijes soziei y saniteres deberieda cun chemuns y assoziazions di genitores bele scumencià dan 10 ani.
Sun la basa de na lege provinziela à chësta grupa de lëur pudù dé truep mpulsc per la ntegrazion te scola. La pert zentrela de si lëur cumporta l coordinazion y usservazion dl’ativitieis per ntegré sculeies cun dificulteies.
Una dla arjontes prinzipeles ie stata l’acurdanza danter scolina, scola y servijes de raion. L ie unì fat ora la cumpetënzes dla singula istituzions ruvan a una sun la pruzedures y i pruvedimënc de sustëni che ie debujën canche n se ntënt che n sculé à dificulteies.
Per pudëi svilupé inant la ntegrazion scolastica iel nce unì nvià via na nrescida sun la cualità dla ntegrazion tla scoles de duta trëi grupes de rujeneda.
Calan de reviers a n dejené ntier de lëur, ie nce la tlassificazion nternaziunela dla capaziteies, dla dificulteies y dla sanità (ICF) stat pruvedimënt de mpurtanza zentrela. La se trata tlo dantaldut de capì miec i sculeies y si debujëns, dajan mpurtanza a si pertes stersces.
La grupa de lëur per la ntergrazion scolastica a livel provinziel se à per i proscimi mënsc tëut dant de se de ju dassënn cun la planificazion de vita da pert di mëndri y di jëuni.
as
