Atualità
Ai 6 de auril: Cungres sun la furmazion di nsenianc ladins
USP – Vën pa l’esigënzes de nosta sozietà y dla scola ladina curides cun la furmazion atuela di nsenianc? La resposta dëssa dé n cungres scientifich metù a jì n ucajion di 10 ani dla Repartizion ladina d’Università de Bulsan. Esperc de furmazion, respunsabli dl’università y dla scola ladina, deberieda cun l assessëur provinziel ladin y respunsabli da vita soziela fajerà l pont dla situazion n cont dla furmazion di nsenianc ladins. L cungres dal titul “Le ladin tl sistem furmatif” vën tenì n mierculdi ai 6 de auril tla sënta universitera a Persenon.
D’autonn va n drova la reforma dla furmazion di nsenianc y do 10 ani che l fova unì metù su la Repartizion universitera ladina vëniel tenì n cungres scientifich che dëssa mustré su co che la furmazion di nsenianc ladins dëssa unì svilupeda inant.
L nseniamënt di sculeies à na gran fazion sun l’educazion dla cumenanza. Y chësc nseniamënt depënd nce truep dala furmazion di nsenianc. Perchël nvieia l Dipartimënt provinziel per la furmazion ladina deberieda cun la Repartizion ladina dl’Università no me esperc dl ciamp, ma nce i respunsabli dl aministrazions publiches, de istituzions y assoziazions a se de ju cun chësc argumënt.
Al cungres “Le ladin tl sistem furmatif”
n mierculdi ai 6 de auril,
cun scumenciamënt dala 9.00 danmesdì
tla sënta universitera a Persenon,
Regensburger Allee 16
ie nce nviei i culaburadëures di media.
Tl cungres uniral prejentà la situazion atuela y la pruspetives per l daunì dl sistem furmatif dla Provinzia de Bulsan. Reprejentanc dai Grijons, Friul, da Fascia y Fedom stlarirà si situazion dla scoles y scolines n referimënt a si reformes y proiec nueves. Domesdì uniral prejentà l svilup y la pruspetives dla Repartizion ladina dl’università, prejentan pona nce l’atività didatica y scientifica. L Cungres finerà via cun na mëisa turonda ulache duc puderà purté dant si prupostes per ti jì ncontra mo de plu ai debujëns dla scoles y scolines ladines.
Reladëures dl cungres:
Roland Verra, ntendënt ladin dla Provinzia de Bulsan
Mirella Florian, sëurastanta dla scola fasciana
Federico Vicario, prufessëur dl’Università de Udin
Rico Cathomas, prufessëur dl’Università de St. Gallen
Theodor Rifesser, cuordinadëur dla Repartizion ladina dl’Università de Bulsan
Paul Videsott, prufessëur de ladinistica a Persenon
Heidi Siller-Runggaldier, prufessëura dl’Univesità de Dispruch
as
