Atualità
Ultima cater enes per mandé ite pec de leteratura ladina
USP – Nchin ala fin de mei possa duc i nteressei mandé ite stories adatedes a jëuni y jëunes per l cuncors de leteratura ladina scrit ora dal Ufize provinziel per la Cultura Ladina. Cun pesc’ per na soma de 6.000 euro y la publicazion di scric te n liber sustën la Provinzia de Bulsan l scrì tla rujeneda ladina.
Tla terza edizion dl cuncors de leteratura an ulù dé n azënt ala junanza: i pec mandei ite dëssa se adaté da liejer per jëuni y jëunes, per chëi che scrij iel nce unì fat na categuria de jëuni dai 16 ai 19 ani. L cuncors ie unì dedicà al mond di jëuni davia che tla rujeneda ladina iel me puecia leteratura adateda i jëuni. Per l cuncors vëniel damandà pec che rejona de curaje zevil, dl daunì o de lidëza.
Cun chësc cuncors uelen dé na sburdla de mutivazion a scrì tla rujeneda ladina. Per la doi categuries (16 - 19 ani y sëura i 20 ani) iel unì njenià pesć per de ndut 6.000 euro. “L porta legrëza y sudesfazion a dé ite n lëur che n à scrit nstës cun si ideies y si persunalità” spiega Alexander Prinoth, diretëur de repartizion. I scric plu garatei ne unirà nia me premiei cun scioldi, ma i unirà nce publichei te n liber. Iust te na mëndra grupa de rujeneda ne iel nia saurì publiché pec de leteratura ajache l ne ie nia na gran cumpëida de jënt che i liej. L Assessorat provinziel ala Cultura Ladina se à perchël sëurantëut de dé ora n liber cun i plu biei pec mandei ite per l cuncors. Per l cuiertl de chësc liber uniral mo fat n cuncors a pert, aldò di pec de leteratura.
Na ucajion particulera vëniel aldò de Prinoth nce dat ai jëuni: “Fé n pez per l cuncors cumporta nce l rafurzé dla creatività persunela tl scrì y chëla mperen a purvé”. La categuries dedicheda ai jëuni urta avisa i sculeies dla scoles autes.
I pec de leteratura ladina possa unì mandei ite nchin ai 31 de mei 2011 tl Ufize per la Cultura ladina, streda Bottai 29 a Bulsan. La bandida dl cuncors lascia mé pro n sëul lëur per persona che mesura almanco cin plates DIN A4 (4.000 paroles). La stories damandes ne possa nia vester na traduzion y ne possa nia vester bele publichedes. I particuleres dla bandida dl cuncors ie nce da liejer do tl internet sot a www.provinzia.bz.it/leteratura y possa unì damandei do pra Barbara Perathoner dl Ufize provinziel per la Cultura ladina (telefonn 0471 41 70 21). L vën metù a cuer de liejer avisa i criteries dla bandida dl cuncors.
I lëures per l cuncors leterer „Autëures Ladins Scrij 2011” unirà valutei da na cumiscion de sies cumëmbri esperc. Deberieda cun l presidënt Marco Forni iel Roberta Dapunt, Isabella Ties, Claus Vittur y Margherita Senoner.
as
