Atualità
31 de mei: ultimo di per l cuncors de leteratura ladina cun publicazion
USP – Nchin te doi enes, ai 31 de mei, ti vëniel a duc i ladins mo dat ucajion de mandé ite stories scrites per jëuni. I pec che unirà mandei ite per l cuncors de leteratura scrit ora dal Ufize provinziel per la Cultura Ladina unirà cialei tres da na cumiscion de esperc. Chëi che unirà valutei plu biei unirà pona publichei te n liber.
Te na pitla grupa de rujeneda se fejen ert a dé ora n liber che vënie nce liet da tan’ de jënt da curì l custimënt. Tres l’Assessorat provinziel ladin uniral dat or n liber cun i plu biei pec dl cuncors „Autëures Ladins Scrij 2011”. “La populazion ladina rejona si rujeneda gën y cun plajëi, ma l mancia mo n pue’ l material scrit che resta nce sciche documënt tl daunì” cun chësc pensier sustën l assessëur Florian Mussner la leteratura ladina uneran i pec dl cuncors leterer cun na publicazion.
L cuncors de leteratura ladina, dedicà chëst iede al argumënt de curaje zevil, l daunì y la lidëza, ruva bele a si terza edizion. Dl 2003 fovel per l prim iede unì scrit ora n cuncors de leteratura ladina. Sëuraprò al pest fova i scric de Ivan Senoner y Maria Pedevilla unic publichei te n prim liber nasciù da n cuncors de leteratura. Dan cater ani à la Repartizion provinziela ala Cultura Ladina scrit ora n segondo iede l cuncors y à pona publicà n liber cun i lëures de Ivan Senoner y Iaco Rigo. “Chësc liber ie unì metù a desposizion de truepa biblioteches y tla scoles per l nseniamënt de rujeneda. Tl ufize a Bulsan ie me plu restedes puecia copies” conta l diretëur de repartizion Alexander Prinoth. Dan che nce i miëur pec dl terzo cuncors de leteratura unirà premiei cun na publicazion, uniral mo scrit ora la grafica dl cuiertl dl liber. Ala publicazion de pec letereres ti dà l assessëur provinziel ladin na gran mpurtanza culturela: “La rujenedes possa me sëuraviver sce la à nce la leteratura che la cumpanieia, publicazions da pudëi cialé do y che la jënt à plajëi de liejer”.
Sëuraprò ala publicazion iel per l cuncors de leteratura nce unì njenià pesć per na soma de 6000 euro. La Repartizion provinziela ala Cultura y Ntendënza ladina à udù dant doi categuries aldò dl età: jëuni danter 16 y 19 ani y duc sëura i 20 ani.
Duc i particuleres dla bandida de cuncors ie da pudëi liejer do sun la plata web www.provinzia.bz.it/leteratura, nfurmazion possen nce damandé do pra Barbara Perathoner dl Ufize provinziel per la Cultura ladina (telefonn 0471 41 70 21). La stories scrites per jëuni possa unì mandedes ite nchin ai 31 de mei 2011 (dala 12.00) tl Ufize per la Cultura ladina, streda Bottai 29 a Bulsan.
as
