Atualità
Energia dal vënt: n cajo nce per de plu chemuns
USP – Per pudëi fé mulins dal vënt per la produzion de strom ova la Jonta provinziela metù dant criteries tleres. Truep chemuns che ie bele dëibli de strutures, ne arjonj nia chisc criteries y nsci vëniel cialà do pusciblteies per ti giaurì la streda nce a chisc chemuns.
Degun mulins dal vënt tla valedes, deguni ulà che n ne ti ruva nia permez cun na streda, deguni ulache l ne ie nia assé che tol ju l strom, deguni sëura 2500 metri de autëza y deguni ulache l ne tira nia l vënt cun almanco 5 metri al secunt. Chisc criteries lascia me pro parcs dai mulins sun l Prëner, a Vals, a Al Plan, Sarntal, Renon y Villanders.
Majera pert di chemuns cunscidrei dëibli de strutures y ulache la jënt manacia de se n jì, ne arjonj nia i criteries. “Ulon sustenì chisc chemuns y i mulins dal vënt fossa na bona ucajion” à dit Durnwalder. Per chësta rejon lascia la Jonta provinziela fé n szenario coche la fossa a lascé do n fruz i criteries. “Sce auzon la sëida da 2.500 a 2.700 metri d’autëza se gëura la puscibltà per Langtaufers, Mühlwald y Pflersch” à dit Durnwalder.
La Jonta provinziela ne à te chësc pont mo nia tëut na dezijion. L assessëur Laimer lascerà lauré ora modiei per pudëi pona tò na dezijion definitiva.
as
