Atualità
“Panorama 4” mostra su ert nueva te Südtirol – nunzië nchin de utober
USP – N gran mostra coletiva dl’ert nueva tl Südtirol sarà n auter ann, tl 2012, l resultat de na culaburazion danter la repartizions provinzieles dla cultura y l Museion. Artisc' jëuni possa mo se nunzië nchin ala fin de utober per fé pea la mostra “Panorama 4”. Nce urganisazions artistiches possa se nunzië artisc' al Ufize provinziel per la cultura per chësta mostra che tol ite duta trëi grupes de rujeneda.
La trëi repartizions cultura dla Provinzia Autonoma de Bulsan mët a jì deberieda cun l Museion, che lëura chëst ann pea per l prim iede, na edizion nueva dla mostra “Panorama 4. Ert nueva te Südtirol”. Do l suzes dl’ultima mostres dl 1987, 1993 y 2003 vala do belau diesc ani de purté a lum artisć jëuni y artistes jëunes tl ciamp dl’ert. La mostra, che unirà a se l dé da mei a lugio dl ann che vën, prejenterà n cheder cumplet de pusizions, tendënzes y formes de esprescion artistiches defrëntes.
I curatores dla mostra ie Lisa Trockner sciche reprejentanta dla grupa de rujeneda tudëscia, Denis Isaia per la grupa de rujeneda taliana y Tobia Moroder per la grupa de rujeneda ladina. Sëuraprò laurerà nce pea doi curatores da oradecà: si udleda da dedora purterà zënzauter a lum aspec nueves dla cuntreda artistica te Südtirol ie da udëi sciche n arichimënt y na nuvità tl cunzet da chëst ann. La mostra unirà documenteda tres n catalogh.
L fin dla mostra ie chël de ti dé na lerch ala generazion jëuna de artisć y artistes de Südtirol. Artisć y artistes possa se candidé pra la mostra dajan ju na documentazion reprejentativa de si lëures (mapa de lëures, CDs, videos, …) tla Repartizion Cultura tudëscia, streda Andreas Hofer 18, Bulsan. L terminn per dé ju la documentazion toma ai 28 de utober 2011. Per nfurmazions sëuraprò fossel da cherdé su o ti scrì ala respunsabla dl proiet Alexandra Pan (tel. 0471 41 33 66; e-mail: alexandra.pan@provinz.bz.it) .
Istituzions artistiches, galaries y museums vën priei bel de cunlauré y de dé inant la nfurmazions a artisć y artistes che pudëssa avëi nteres a tò pert a chësta scumenciadiva.
as
