Atualità
La storia di ladins dla Dolomites, vënderdi ai 19 de agost a Corvara
USP – La prejentazion dl liber „Storia die ladini delle Dolomiti“, n vënderdi ai 19 de agost a Corvara stluj jù na lingia de prejentazions tla valedes ladines ntan chësc instà. Tl cheder dla scumenciadiva „Un libro, un rifugio“ à l liber de Werner Pescosta, dat ora dal Istitut Ladin Micurà de Rü“ giapà n post de unëur.
Tl sala dla manifestazions de Corvara prejenterà l autor Werner Pescosta n vënderdi dala 17.30 l liber sun la storia di ladins dla Dolomites. N puderà audì velch dla lijëndes, dla storia, dla rujeneda, dla politica y dla vita da uni di tla valedes dla Dolomites. L autor dl liber dajerà inant la cunescënzes sun la Dolomites y sun l sentimënt dla mendranza ladina.
Truep seculi alalongia iel stat jënt che à vissù danter la Dolomites, ma permò do l 1796 ie chësc crëp deventà cunesciù danter studiei y turisć. Per cunëscer chësta montes muessen aldò de Pescosta nce cunëscer la vita, la lijëndes y storia per se ambienté te chësc raion. Chësc ie nce chël che l autor dl liber se à tëut dant per la prejentazion n vënderdi a Corvara. Deberieda cun l diretëur dl Istitut Ladin Leander Moroder y Michil Costa, presidënt dla Maratona dles Dolomites dajerà Pescosta n cheder de pertes cultureles che l vijitadëur dla Dolomites nce vëij nia tla prima udleda. „Cunescian la storia, possa uni un purvé a sentì l’emozion de vester sun i medemi troies y luesc ulache l ie unì vissù tëmps de viera o ulache vif i prutagonisć dla cultura contemporanea“ dij Pescosta.
Pra la prejentazion dl liber a Corvara saral nce da audì cianties ladines dl Cuartet Göma y l pianist Alessandro Trebo.
as
Galaria dales fotografies
L liber “Storia dei ladini delle Dolomiti” unirà ai 19 de agost prejentà a Corvara.
