Atualità
Chisc dis vëniel mandà ora l „Pas culturel“ nuef
USP – Cun l „Pas culturel“ giapa i cumëmbri ulenteres de lies cultureles l priesc de manifestazions y museums lascià do nchin al 50%. Chisc dis à l Ufize provinziel Cultura ladina mandà ora l „Pas culturel“ nuef che vel doi ani. Sce vel lia culturela ne l ëssa nia giapà, possela se l damandé.
L lëur de ulentariat te uni ciamp ie na desmustrazion de mpëni atif di zitadins y dla zitadines che dà ca si tëmp liede per solidarietà, cultura y l tenì adum a livel soziel, culturel y uman. L pas culturel ie n pitl recunescimënt per duc chëi che lëura debant te na lia o urganisazion cun l fin de fé cultura.
Bele dan diesc ani, n ucajion dl Ann Nternaziunel dl Ulentariat, fovel unì pensà de valorisé l lëur de ulentariat tres la scumenciadiva dl pas culturel. Chësc pas vel doi ani y vën chisc dis mandà ora da nuef.
La lies cultureles tla val Badia y te Gherdëina giapa doi de chisc pasc mandà prò dal Ufize dla Cultura Ladina. L possa unì adurvà pra majera pert di museums y pra manifestazion per giapé n priesc lascià do nchin al 50%. Danter la passa 50 istituzions y museums che fej pea chësta scumenciadiva dla Provinzia de Bulsan nen iel nce cater tla valedes ladines. L se trata dla linges de cunzerc “Jëuni de Mujiga Gherdëina” y l festival “valgardenaMusika” cun l Mseum Ladin (y Ursus Ladinincus) y l Museum de Gherdëina.
9.000 pasc culturei ie ntan i ultimi 2 ani unic dai ora te dut Südtirol. Chësc mostra su l suzes de chësta scumenciadiva per valorisé l lëur de ulentariat.
Sce vel lia culturela ne ëssa nia giapà chësc pas culturel possela se l damandé tl Ufize Cultura ladina a Bulsan (tel 0471 417020, www.provinzia.bz.it/cultura-ladina).
as
