Atualità
Finanziamënc per la scoles ladines: segurëza tres l pruporz
USP – La furmazion y la scoles vën tla valedes ladines finanziedes dala Provinzia de Bulsan tres de plu canai: i nsenianc depënd dala cumpëida de iscrizions, la frabiches vën fates aldò dl bujën y l’atività vën finanzieda aldò de plu criteries. La basa de tratatives per finanziamenc y l pëis che la populazion ladina giapa depënd n majera pert dal pruporz. D’autonn unirà la proporzion dla trëi grupes de rujeneda cumpededa ora da nuef. I zitadins puderà se detlaré anonimamënter pra si grupa de rujeneda.
La cumpëida de nsenianc y na pert di finanziamënc per aministré la scoles tla provinzia de Bulsan depënd dala cumpëida de sculeies. L’atività scolastica vën finanzieda aldò dla tipologia dla scola y dl pruporz. Per la scoles ladines iel chëst ann 1.133.500 euro a desposizion. Leprò ruva mo d’autri finanziamënc che reverda l’università y la furmazion permanënta che va a bën de duta trëi grupes de rujeneda. “L finanziamënt dla scoles ladines ne depënd nia defin dal pruporz, ma la cumpëida de chëi che se à detlarà ladins ie la fundamënta per fé valëi la scola ladina canche la se trata de spartì scioldi publics“ spiega l assessëur Florian Mussner. La detlarazions anonimes che unirà dates ju d’autonn valerà 10 ani, nchin ala cumpededa dla jënt tl 2021.
I scioldi a desposizion per l’atività scolastica tla valedes ladines ie spartì su te trëi pertes: 1.071.850 euro ie udui dant per la didatica generela, proiec de scola o esigënzes particuleres de uni scola (sculeies cun handicap, imigrei, …). La soma de 43.650 euro vën chëst ann data inant ai chemuns per l’atività tla scolines y 18.000 euro vën adurvei per nvestizions tla scoles. La scoles muessa te si atività tenì cont de truep ciamps per pudëi curì l bujën y seguré la furmazion a duc si sculeies. I finanziamënc per l’atività scolastica vën nsci nce nuzei per mubilia speziela o aparac per sculeies cun handicap, per materies opzioneles, per fé unì adalerch vel espert, per la furmazion spezifica di nsenianc o per proiec inuvatives cun l fin de adaté l nseniamënt ai bujëns de nosc tëmps. L sistem paritetich dla scoles ladines se damanda material didatich te doi o de plu rujenedes, a chësta maniera iel nce debujën de n finanziamënt che va sëura l pruporz ora.
Strutures sciche cëses de scola, palestres o cëses di studënc vën finanziedes da chemuns y Provinzia aldò dl prupoz y dl bujën. “La detlarazions che unirà dates ju d’autonn n ucajion dla cumpededa dla jënt ti dà l pëis ala grupa de rujeneda y dajerà – aldò di resultac – nce segurëza per l finanziamënt publich per la furmazion dla jënt ladina” dij l assessëur ladin.
Finanziamënt per l’ativiteies scolastiches*
Scoles tudësces: 25.392.110 euro
Scoles talianes : 10.594.200 euro
Scoles ladines: 1.133.500 euro
DE NDUT: 37.119.810 euro
* D’autri finanziamënc, sciche chël per l’Università, va a bën de duta la grupes de rujeneda.
as
