Atualità
Di dla Cultura Ladina (2): cunsciderazions sun la cumpededa
USP - L di dla Cultura Ladina (NCUEI) ai 30 de setëmber a Bulsan, à sëuraprò ai referac y rujenedes nce pità ucajion de purté dant cunsciderazions y de stlarì dumandes. Pra la descuscion iel unì rujenà de cunseguënzes dla detlarazion de grupa de rujeneda y de na puscibltà de n pruporz flessibl tl otica dl daunì.
L pruporz ie l strumënt per spartì ressorses publiches danter la trëi grupes de rujeneda dla provinzia de Bulsan. Zitadins imigrei o families cun genitores de doi grupes de rujeneda ne à nia na si lerch te chësc sistem y muessa perchël fé na detlarazion de agregazion a una o l’autra grupa de rujeneda. Tla descuscion iel unì ora che sce n cunësc la cunseguënzes dl pruporz y la situazion dla mendranza ladina cun si pitla cumpëida, iel da se mbincé che chësta families mescededes sustënie cun si detlarazion anonima la mendranza ladina.
La proporzion danter la grupes de rujeneda vën per i ladins (4,37%), matematicamënter permò a valëi te cunsëies o cumiscions cun amaca 15 cumëmbri. Te medri cunsëies iel na cuestion dl majer rest dla divijion. Tl cajo dl tribunal aministratif regiunel TAR iel massa puecia stieres per magistrac da resservé na stiera ala mendranza ladina (cun si 4,37%). Te de tei caji iel unì damandà de garantì na reprejentanza ladina segura nce sce la cumpëides ne basta nia per l pruporz.
Davia che chëst iede uniral damandà na detlarazion anonima (che ie na cossa defin a pert dala detlarazion persunel che muessa me plu unì fat n iede tla vita), iel tla descuscion dl Di dla Cultura Ladin unì fat referimënt ala cunseguënzes dla detlarazion de grupa de rujeneda sun la stieres, i cuatieres y l finanziamënt per furmazion y cultura. Tl cajo dla stieres publiches à la mudazion dl pruporz de me 0,1% na cunseguënza sun 40 stieres publiches.
Nce sce la detlarazion de grupa de rujeneda a na gran fazion sun la spartizion di mesuns publics danter la grupes de rujeneda y l ie na custion defin matematica, à l assessëur ladin nvià la populazion ladina de se detlarè aldò de coche i se sënt dedite y dl’identità.
Pra la mëisa de descuscion à rujenà Silvia Alfreider dl Museum Ladin, i aucac Manuela Obojes y Thomas Piccolruaz, deberieda cun l assessëur Florian Mussner, cun la moderazion de Edith Ploner.
as
