Atualità
Onoranzes por l’impëgn particolar tl mantignimënt di bëgns culturai
USP – Le mantignimënt di bëgns culturai ne n’é aladô dl Presidënt dla Provinzia nia ma n dovëi dl’aministraziun provinziala, mo dantadöt mëss ince les porsones privates avëi chësta convinziun. Cun chësc pinsier él gnü surandè (incö) ai 3 de novëmber tl Palaz Mercantil a Balsan 19 onoranzes. I assessurs Mussner, Kasslatter Mur y Berger à ince onorè döes families ladines: la familia Castlunger de Badia y la familia Ellecosta da San Martin.
Bele dl 1973 ti êl gnü surandé al’aministraziun publica la sconanza di bëgns culturai, che fej dedüt por mantignì les feter 5000 frabiches sot a sconanza, i 126 posć d’escavaziun y i tröc archifs. Chisc bëgns culturai à dit le Presidënt dla Provinzia "é na richëza por döta la provinzia." Al à rengrazié da pert dla Junta provinziala i ghesć d’onur por so impëgn ejemplar por la sconanza di bëgns culturai, y por so entusiasm y so amur por le mantignimënt di bëgns culturai de valüta". Le Presidënt dla Provinzia à inće rengrazié le vësco Ivo Muser, che ê inće dailò, por le contribut dla dlijia ala sconanza dal cultura, storia y tradiziun.
L’assessuria Kasslatter Mur à dit che al é sambëgn düć che é a öna che al vëgnes sostignì y mantignì nosc daćiasa, inće sce an ne n’é nia dagnora a öna sön ći che dess gnì sconè y les mosöres da mëte a jì. La sconanza di bëgns culturai é inće liada ala ćiaria economica, datrai inće cun le renunzia de davagné da pert dl proprietar de frabiches storiches. A na moda che le mantignimënt y la sconanza di bëgns culturai sides importanć por düć, mësson dè inant che ara se trata de n compit important. N tru cuntra n majer respet y consëns por la sconanza de nosta arpejun culturala é chël de de ti dè tres indô ala popolaziun la poscibilité da ti ćiarè da daimprò ai resultać dl mantignimënt di bëgns culturai, por ejëmpl, vara da daurì na frabica storica al publich do che ara é gnüda ressanada. L’assessuria ti à dit ai ghesć d’onur che "les patrones y i patruns de bëgns culturai sot a sconanza ne ćiara nia ma de n oget storich, mo ai investësc inće tl’arpejun culturala de nosta provinzia; ai porta pro a localisé a na manira concreta nosta identité madorida a livel storich. Ai scona testemonianzes importantes de tëmps passà, cun le sconè y mantignì por nos y chi che vëgn dô."
La familia Klaus Castlunger de Badia é gnüda onorada por le ressanamënt dl lüch Sompunt che dess ester n ejëmpl. Tres la roa dl 2008 ê le lüch Sompunt gnü danejè dassënn. Ara è ma jüda da salvè le lüch tres la bona colaboraziun cun la familia Castlunger. Te chësta ocajiun él inće gnü dortoré la stüa dl lüch.
Alma y Bernhard Ellecosta da San Martin de Tor à podü pié do la onoranza por avëi ressanè a na manira ejemplara le vedl Bagn Valdander. Ti agn 2007 y 2008 êl gnü ressanè chësc bagn da paur che é insciö romagnü n bëgn cultural che testemoniëia la tradiziun di bagns. Cun chësc ressanamënt él inće gnü mantignì les portes storiches y i vedli func.
as
