Atualità
Cunsulta ladina di jëuni dà la crëta a Patrick Stuflesser
USP - Patrick Stuflesser menerà nce per i proscimi trëi ani la Cunsulta ladina di jëuni. N vënderdi sëira (2 dezëmber) à la Cunsulta nueva tenì si prima senteda cun vela dl presidënt. L assessëur provinziel ladin Mussner à te chësta ucajion tëut su n prim cuntat persunel cun chësc organn consultif per la Jonta provinziela y à cialà inant sun i argumënc de atualità per i jëuni.
La cunsulta nueva lëura tl sëni de inuvazion y cuntinuità. Sun 10 cumëmbri dla Cunsulta ova la Jonta provinziela dan doi enes azetà la pruposta de sies nueves. Tla senteda costituënta ie pona duc stai a una de ti dé la crëta a Patrick Stuflesser sciche presidënt. L pere de familia de 37 ani de Urtijëi fova i trëi ani passei bele stat presidënt y à tëut su la ncëria nchin ala fin dl 2014. Patrick Stuflesser ie bele l terzo iede tla Cunsulta di jëuni y fova nce stat presidënt dla Nëus Jëuni Gherdëina. Per la ncëria de vizepresidënt à Gottfried Nagler giapà la crëta de duc i cumëmbri. Nagler, 31 ani de Badia, ie l segondo iede te Cunsulta y l prim iede vizepresidënt.
Tla la senteda costituënta à l assessëur ladin Florian Mussner pudù mparé a cunëscer i cumëmbri nueves y ti à nce dat pea vel pensier sun la funzion dla cunsulta. L duvier prinzipel dla Cunsulta ie de lauré ora na cunsultazion sun argumënc di jëuni ulache la Jonta provinziela muessa pona tò na dezijion. Chësc reverda da una pert i programs anuei per l Ufize provinziel per i jëuni y dal autra pert prupostes de lege o pruvedimënc a bën di jëuni. Pra la senteda costituënta stata tl Zënter di jëuni a Urtijëi à nce l diretëur dl Ufize provinziel per i jëuni Klaus Nothdurfer prejentà duvieres y pusciblteies dla Cunsulta ladina di jëuni.
as
