Atualità
Al vëgn chirì les “parores" y “parolates" dl 2011
USP - Da n valgügn dis él tla rëi la plata nöia www.wopapa.it/la/wopapa/default.html tres chëra che an po menè ite propostes por la lîta dla "parora" y dla "parolata" dl ann 2011. Dal 2005 incà chir fora ince tl Südtirol na iuria les parores y les parolates dl ann fora dles propostes che é gnüdes menades ite dala popolaziun. La scomenciadia vëgn fata por düc trëi i lingac dla provinzia, todësch, talian y ladin. Al é ince n liam a facebook.
Cares é pa parores dl ann?
Parores dl ann é parores che à portè a discusciuns y fat baié la popolaziun tratan l’ann tla provinzia de Balsan y tla Ladinia, anfat sce por rajuns positives o negatives.
Cares é pa parolates dl ann?
Parolates é parores nia tan garatades, che ne passenëia nia dal punt de odüda linguistich, che proa da abelì, da ascogne la realté, che ne ti porta nia respet ales porsones.
Co vëgnel pa lité?
La popolaziun dl Südtirol y dla Ladinia po menè ite propostes por todësch, talian y ladin ćina ai 31 de dezëmber 2011. La dezijiun finala vëgn tuta da na iuria che chir fora la parora y la parolata dl ann danter dötes les propostes menades ite.
Les propostes po gnì menades ite te düć trëi i lingac ćina ai 31 de dezëmber 2011 ala misciun: sprache@kulturinstitut.org, Südtiroler Kulturinstitut, Schlernstraße 1, 39100 Balsan/Bolzano/Bozen. Les propostes po inće gnì dades jö (tratan le mëis de dezëmber) ti punć de racoiüda organisà: tla Biblioteca provinziala Friedrich Teßmann, Balsan, tles biblioteches universitares a Balsan y Porsenù.
usp
