Atualità
Stories per ladin sun l iPhone y sun l iPad
USP – Na pruposta defin inuvativa pieta l Ciamp per Inovazion dla Scola Ladina (ex- Istitut Pedagogich) per l ann nuef. Na lingia de stories tla cater rujenedes, ladin, tudësch, talian y nglëisc ie unides anjeniedes te n App per pudëi les udëi y audì sun l iPhone y sun l iPad.
La rujeneda ladina y l viver cun de plu rujenedes giaterà proscimamënter nce esprescion sun l fonin iPhone y l iPad, l pitl computer da tò pea sun streda. Bele dala fin de jené puderan desćiarië - sëura dut l mond - na lingia de stories te cater rujenedes per debant dal "App Store" (l inuem di App’s ne ie mo nia registrà). L se trata dla 7 stories che fova unides publichedes dl ann 2007 te n liber cun na CD-ROM dal Istitut Pedagogich. Chësta stories per ladin, tudësch, talian y nglëisc ie unides drët damandedes da families y nsenianc.
“L’esperienza à desmustrà che n chier for plu y plu stories te de plu rujenedes per mparé bele da pitl insù la rujenedes”, spiega Theodor Rifesser, diretëur dl Servisc per Inuvazion. Chësta stories à bele abù n gran suzés tla verscion audio sun internet, śën unirales publichedes te na forma da udëi y da audì a na maniera che mo de plu nteressei puderà se nuzé de chësta puscibeltà nueva de mparé la rujenedes.
Dlongia l liber y la zaita vën for plu y plu suvënz nce adurvà la formes digiteles dl iPad y iPhone per liejer nutizies, per liejer vel storia o mparé zeche da nuef. Chësc mesun eletronich davania da di a di de plu simpatisanc. “Sce udon che me ti ultimi cater mënsc iel unì vendù 43 milions de iPhone y 11 milions de iPad pona vëijen ce potenzial de jënt che n à dovia” dij l diretëur dl ex-Istitut pedagogich. Perchël se nuzea nce l Ressort Scola y Cultura ladina tres l Ciamp Inovazion y Consulënza de chësc mesun per fé cunëscer nosta situazion plurilinguela sëura dut l mond.
as
