Atualità
Cuntribuc per la cultura ladina: udienza n lunesc ai 30
USP – Lies che fej atività culturela ladina possa nchin ai 31 de jené fé dumanda per n sustëni a finanzië ativiteies ntan l ann 2012. Per la lies de Gherdëina vëniel n lunesc ai 30 de jené pità na udienza te chëla che l vën dat nfurmazion y judà a fé la dumandes. Te chësta ucajion vëniel nce pià do la dumandes.
L Ufize provinziel per la Cultura ladina pieta nce chëst ann n aiut speziel per damandé cuntribuc culturei te chëla che i culauradëures unirà nstësc ti luesc ladins per pië do la dumandes. Nchin ai 31 de jené 2012 possen mandé ite dumandes de sustëni finanziel per ativiteies ordinaries. Ntan la udienzes tla valedes uniral nce tëut ju dumandes che reverda nvestimënc, publicazions y proiec de artisć .
N lunesc ai 30 de jené unirà chësc servisc pità dala 16.00 ala 18.00 tla Cësa de Chemun de Sëlva. Tla Val Badia iel la udienza bele unida piteda chisc dis passei. “Chësc servisc ti luesc ie i ani passei dantaldut unì priejà da chëi che fej l prim iede na tel dumanda. Tlo vëniel nce stlarì ciun documënc che l va debujën y co che va la pruzedures” sorissea l assessëur ladin Florian Mussner.
La dumandes per cuntribuc provinziei possa nce unides mandedes ite tres posta, al Ufize cultura y scola ladina dla Provinzia de Bulsan, streda Binder 29, 39100 Bulsan.
I formuleres per fé dumanda giaten tl web sun la plata www.provinzia.bz.it/ntendenza-ladina/service/formuleres-cultura.asp o tl Ufize cultura y scola ladina a Bulsan, numer de telefonn 0471-417020/21.
La dumandes de cuntribuc per nvestimënc, publicazions y proiec artistics tl ciamp dla cultura ladina, possa al incontra unì dates ju ntan dut l ann.
as
