Atualità
Cufer de archeologia per la scoles ladines
USP - Danter la scumenciadives dl Dipartimënt ladin per l’educazion dedichedes al’archeologia y ai prim seculi de vita dla populazion ladina, iel unì njenià n cufer de materiai didatics. Doi cudejiei per la scoles dedichei al tëmp dl fier tla Ladinia ie da permò unic prejentei tl Museum de Gherdëina.
I materiai per la scoles ie fai a na maniera inuvativa y pieta ai sculeies la puscibltà de ne lauré nia me cun libri y cudejiei, ma cun n cufer de materiai dedichei al’archeologia. Tlo iel per ejëmpl nce guanc fai tl stil dl tëmp dl fier o fibules, urnamënc y d'autri materiai che fej riferimënt ala culezions dl museum. I materiai nueves ie frut de na culaburazion danter l Departimënt Ladin per l’educazion, l’esperta de pedagogia museala Thea Unteregger y l Museum de Gherdëina. Chisc materiai ie pensei dantaprima per la scoles mesanes.
Pra la prejentazion ai 27 de auril tl Museum de Gherdëina à l archeologh Umberto Tecchiati dla Repartizion Bëns Culturei dla Provinzia de Bulsan tenì n referat sun l’ultima scuviertes dl tëmp dl fier che ie unides fates sun Col de Flam y tl raion da Mauriz a Urtijëi. Thea Unteregger, l’autora di cudejiei tla rujeneda tudëscia à tenì n workshop cun i nsenianc per ti mustré co che possa unì adurvei i materiai didatics nueves y l cufer d’archeologia. Te chësta ucajion à l ntendënt Roland Verra sorissà la mpurtanza de nosta preistoria sibe per la materia storia, che nce per la cunescënzes sun la fundamëntes dla populazion ladina. L servisc provinziela de Inuvazion y Cunsulënza lëura te chësc mumënt nce sun d’autri materiai dedichei al tëmp dl bront tla valedes ladines.
as
