Atualità
Aron Demetz, reprejentanza ladina tla mostra Panorama
USP - Pra la gran mostra de ert nueva a Franzensfeste iel nce unì nvià cater artisc’ dla valedes ladines. I doi jëuni Fabian Feichter y Diego Perathoner, y i doi artisc’ de majera esperienza Aron Demetz y Gerhard Demetz. Tla sëuravijion dl’ert atuela tl Südtirol iel da udëi de ndut 33 posizions de ert contemporanea. – Na prejentazion de Aron Demetz.
L’esperienza artistica de Aron Demetz ie nasciuda, se à svilupà y ie madurida tl cuntest dl’ert dl ziplé de Gherdëina. De chësta tradizion à l artist sëurantëut l savëi tecnich y anatomich y la mpustazion figurativa, ma l à laurà ora i canons tlassics cun n uedl che ti cëla al cuntemporan. Defin nueva ie la nrescida poetica dla dimenscion ejistenziela, n pert ti materiai y dantaldut per coche vën lauredes la sperses. La scultures de Demetz, de regula a grandëza naturela, ie curides cun reja naturela o brujedes tl fuech, y dal’ultima scultures crësc ora dla pel fonc sciche sintoms de na patologia fisica che smagia l corp. Chisc lëures ie na reflescion sun l corp y sun la natura murtela dla persona, de chëla che la scultura devënta alegoria.
I lëures metui ora a Franzensfeste, che porta ite elemënc formei mo nia udui y mostra su n mond cunzetuel nuef, fej pert dl’ultima produzion dl artist. N’erma, da fuech o da tai, devënta n dut un cun l schilet dla persona: na pistola, tenida su te na scatula de uluch cueciun, se mostra cun la cana raideda zeruch, cun l colp che pudëssa pië via de viers de chël che te n at estrem druchëssa l sneler. La reflescion de Demetz se sposta da n livel ejistenziel a n livel cumpurtamentel, dajan da ntënder n anulamënt dla lidëza dan la puscibltà de crì ora.
Nce sce plutosc defrëntes ie chësta scultures mpo liedes ala figures, cun chëles che l artist ie deventà cunesciù, da n pruzes de metamorfosa – na metamorfosa che n ne possa nia plu fermé su y che à purtà, n var ndolauter, a chëla che ie n’evoluzion struturela.
(prejentazion dl curadëur ladin de Panorama, Tobia Moroder)
Aron Demetz (* 1972), à fat la Scola d’Ert y la Scola Prufesciunela te Gherdëina, dal 1997 al 1998 al studià tl’Academia d’Ert a Nürnberg. Dal 2010 nsëniel Scultura tl’Academia d’Ert de Carrara. L viv y lëura te Sëlva.
Mostres y proiec plu mpurtanc
2012 Il radicante, MACRO, Roma, I (solo)
2011 Solide Fragilità, Villa Bottini, Lucca, I (solo)
2009 53. Biennale di Venezia. Collaudi, Padiglione Italia Arsenale, Venezia, I
2008 Aron Demetz, PAC, Milano, I (solo)
2007 Italiana, Shanghai Art Museum, Shanghai, CHN
www.arondemetz.it
Panorama 4
nchin ai 30 setëmber 2012
Furtëza a Franzensfeste
merdi 11.00 – 21.00, mierculdi – dumënia 11.00 – 17.00
d’agost nchin la 18.00
www.provinzia.bz.it/panorama
Articul dla mostra Panorama cun video y ntervistes a
www.provinzia.bz.it/usp-ladin/285.asp?aktuelles_action=4&aktuelles_article_id=396645
usp
