Atualità
L'Intendënt por les scoles tudësces Walter Stifter va in ponsiun
OSP - L'anunzia é gnüda dada incö dal medemo Intendënt Stifter. La dezijiun é gnüda tuta in acordanza cun le presidënt Luis Durnwalder adüm cun l'assessuria ala scola tudëscia Sabina Kasslatter-Mur.
Dô feter 40 agn de sorvisc tl setur dla scola, de chîsc oramai 15 passà cun l'inciaria de Intendënt scolastich, Walter Stifter á damanè de jí en ponsiun. Te na lëtra al presidënt dl Cunsëi scolastich provinzial, l'assessuria Kasslatter-Mur s'á ghiré, ince secundo cî ch'é preodü dal Statut d'Autonomia, la prejentaziun de na lista de trëi poscibli candidac por curí le post de Intendënt por les scoles tudësces.Le Cunsëi ará sëgn 60 dis de tëmp por presentè les propostes ala Junta provinziala, che chiriará fora la porsona plö adatada. La dezijiun mussará spo ince gni ejaminada dal Ministêr dl Istruziun a Roma cina che ala sará spo dldüt efetiva.
Secundo les nöies normes d'atuaziun revardëntes la scola, la nominaziun dl Intendënt nü ne ará plö degun valur por na perioda indeterminada, mo sará varënta por cin agn.
EB
