Atualità
Proiet da d’isté cun maestres dla scolina
USP – En lönesc, ai 23 de messè 2012 scomëncia a La Val le proiet “Scolina da d’isté” por chël che la Direziun dles scolines ladines mët a desposizion maestres de scolina. La Provinzia y le Comun colaborëia por ti jì incuntra a n bojëgn dles families che é tres plü sintì inće ti paîsc ladins.
Tratan les proscimes trëi edemes vëgnel metü a jì a La Val ativitês de grup por i plü pici. Che les families à debojëgn de chësc sorvisc tratan les vacanzes da d’isté desmostra le gran interès de bëgn 19 mëndri bele tla pröma ediziun de chësta scomenciadia. “Por chësc proiet metunse a desposiziun döes maestres de scolina, le Comun mët a desposiziun la strotöra y se crüzia dl’organisaziun” spliga l’assessur ales scores ladines Florian Mussner.
Al é le pröm iade che les scolines ladines fej n te’ proiet da d’isté. Les direziuns dles scolines de lingaz talian y todësch à bele plü sovënz metü a jì val’ de te’. Le pröm proiet de na scolina da d’isté en colaboraziun danter le Comun y la Provinzia é gnü a s’al dè por mirit dla desponibilité y dl interès de tramidöes les perts. “La Direziun dles scolines fej para le proiet “Scolina da d’isté” a La Val deache al é un di püć comuns ladins che n’à nia bele n te’ sorvisc ilò dlungia” spliga l’ispeturia Edith Ploner.
as
