Atualità
Maestres dla scolina se dà jù cun la globalità dla persona
USP - Danter la linga de cursc da instà per l’educadësses dla scolina y nsenianc de scola, iel n vënderdi ai 19 unì finà via n curs particuler a Calfosch. Deberieda cun doi reatëures se à 18 educadësses dla scolina dat ju cun stories che conta dla vita per ti jì plu sot al argumënt dla furmazion di pitli.
L’educadësses dla scolines ladines se à ntan doi dis de furmazion dat ju cun educazion y furmazion di pitli urienteda ala globalità dla persona. I referënc Franz Kett y si assistënta Petra Ostermann à cun l aiut dla culissa naturela de Calfosch sapù da mëter a cuer la tematica ala maestres che d’autonn se dajerà inò ju cun plu pitli tl sistem de furmazion.
L’esperienza di cursc da instà ie bele ti ani passei stata drët positiva: “Te scolina vëijen che chël che ie unì mparà te chisc cursc vën nce trasfurmà tla pratica da uni di” sorissea la diretëura Hannelore Insam. L curs a Calfosch ie unì metù a jì tres i ufizies provinziei per inovazion y cunsulënza dla scoles ladines cun la coordinazion de Mathias Stuflesser.
as
