Atualità
Dala sentada dl Consëi che se dà jö por i jogn
OSP - La relaziun sön le laur che é gnü fat tl ultim ann por i jogn dla mendranza ladina y tudëscia de Südtirol sciöche deplö propostes por le plann anual por le 2004, é sta ma en valügn di punc plö importanc che é gnüs tratà inier, mertesc, ai 29 de otober, intratan la sentada dl Consëi provinzial che se dá jö cun i jogn.
Tla sënta dl Ofize a Balsan che se crüzia di jogn él gnü splighé dai mëmbri dl Consëi provinzial por i jogn che le laur autonom y la figöra dla porsona che se dà jö cun i jogn mëss ciafè plö importanza. Plö conscideraziun ti mëssel ince gni dè al engajamënt volontar di jogn. Le crësce di cosc tl ciamp di jogn, sciöche al resultëia ince dal bilanz de previjiun provinzial, n'é nia tan da atribuì ales tröpes spëises por l'aministraziun mo plö che ater ai cosc por le personal, á dit i mëmbri dl Consëi ch'á ince splighé che por fà funzionè bun düt l'aparat che se crüzia di jogn, dles strotüres y dles organisaziuns joniles te nosta provinzia òl ester en tanc de colaboradusc. Critiché él spo gnü tla sentada da inier che al mancia tres ciamò na lege te Südtirol che defënd i jogn y i mituns, söl ejëmpl dl avocat por i mëindri y por i jogn che atri stac y regiuns talianes á bele. Ince en regolamënt de defenüda di jogn n'él nia gnü laurè fora fina sëgn. 20 sarál passè en ater ann da canche al é jü en forza la lege provinziala por le sostëgn ai jogn. Adüm al Ofize provinzial talian che se dà jö cun i jogn gnarál metü a jí por chësc compliann na manifestaziun cun plö convëgns, mëses torones y referac che recordarà i "20 agn de sostëgn por i jogn te Südtirol". La discusciun é spo jüda inant inier ince sön i proiec che paiará ía y chi bele atifs sciöche chël revardënt la prevenziun dl consum y dl abus de alcol. La campagna "Bever de massa" metüda a jí dales lies y organisaziuns joniles dles valades ladines ti media ladins à ciafè en echo dër positif, él gnü dit inier dai mëmbri dl Cunsëi por i jogn.EB
