Atualità
Scoles de mujiga ladines y tudësces deberieda – Mussner: per l bën di nsenianc y sculeies
USP - L’aministrazion dla scoles de mujiga ti luesc ladins unirà nce tl daunì meneda deberieda cun la scoles de mujiga tudësces. La Jonta provinziela à tenì cont dla situazion particulera dla mendranza ladina y à azetà de nia destaché l’aministrazion dla scoles de mujiga ti luesc ladins. “A chësta maniera à nsenianc y sculeies de plu pusciblteies” spiega l assessëur ladin Florian Mussner.
Tl mpëni de refurmé l sistem de furmazion tla provinzia de Bulsan ova la Jonta provinziela udù dant tò demez i Istituc de educazion musichela a na maniera che l'aministrazion dla scoles de mujiga vënie fata zetralmënter ti departimënc de educazion. Chësc ulëssa di che cun l prim de setëmber 2012 dëssa la scoles de mujiga unì aministredes deberieda cun l'autra scoles per razionalisé y otimisé i lëures.
La scoles de mujiga ti luesc ladins ie, per si situazion de mendranza, te na posizion particulera. Nchinamò ie la scoles de mujiga de Gherdëina y dla Val Badia unides aministredes deberieda cun la tudësces. Nsenianc de strumënc che ne ova nia assé ëures de nseniamënt tla valeda, à pudù jì a tenì vel ëura te scoles tudësces y nsci ruvé pra de plu ëures de nseniamënt.
La Jonta provinziela à te si senteda de chëst' ena, n lunesc ai 27 de agost, azetà che la scoles de mujiga di luesc ladins ne vënie nia spartides dala tudësces. Chësc unirà ufizialisà te n'acurdanza danter i assessëures ala furmazion Florian Mussner y Sabina Kasslatter Mur per sëurandé l'aministrazion dla scoles de mujiga ladines al departimënt de furmazion tudëscia. "L sistem de aministré la scoles de mujiga ladines y tudësces deberieda ie for jit bën per nosta situazion particulera de mendranza ladina, perchël ëi cialà dl mantenì" spiega l assessëur Mussner. Sëuraprò ala puscibltà de plu ëures de nseniamënt per nsenianc, porta chësta dezijion nce n vantaje per i sculeies ladins canche i va a scola tla ziteies. Tlo à la scoles de mujiga na lista longia de tei che aspieta de pudëi zapé ite. "Cun n'aministrazion deberieda iel nce plu saurì che nosc sculeies possa jì inant ala scola de mujiga canche i ie tla ziteies" spiega l assessëur provinziel ladin.
La dezijion de mantenì l'aministrazion dla scoles de mujiga ladines y tudësces deberieda se stiza sun l'idea che te na situazion de mendranza se gëura de plu pusciblteies sce n va la streda dla culaburazion. "Chiche reprejentea la pert ladina possa fé valëi si autonomia y à nce la puscibltà de fé prupostes, unì cun scumenciadives o proiec speziei per la situazion ladina" sorissea l assessëur Mussner.
Per la gestion dl nseniamënt de mujiga iel ënghe unì tenì cont dla situazion particulera dla mendranza ladina. La direzions dla scoles de mujiga a Urtijëi y a La Ila ne unirà nia metudes adum, sciche se damandëssa na logica de razionalisazion y sparani.
as
