Atualità
L’evaluazion mostra la direzion ala Scola ladina
USP – Do che l’analises dl lëur de scola y dla cumpetënzes arjontes dai sculeies ie i ultimi ot ani unides coordinedes da n cumité per l’evaluazion, vën l lëur de evaluazion da chësc ann de scola curà da na culaburadëura dla Ntendënza. Pra l rendicont dl Cumité de evaluazion tla scola ladines dal 2004 al 2012, (NCUEI) ai 11 de utober a Bulsan, iel unì mustrà su la mpurtanza di mpulsc dl’evaluazion per svilupé inant l sistem scolastich ladin. Te chësc mumënt iesen tl lëur da analisé la cumpetënzes di sculeies ladins tla rujeneda nglëija.
I prim fin dl Cumité per l'evaluazion, de merz 2004, fova chël de mëter su standards sun chëi che la scoles dësse lauré. Do avëi nrescì i bujëns dla defrënta scoles, tres truepa ancuntedes, oven spustà l focus dl'evaluazion sun l‘analisa dla cumpetënzes di sculeies. A chësta maniera iel ti ot ani de atività dl Cumité unì laurà truep sun la cumpetënzes de rujeneda, la pert sterscia dla scola paritetica ladina. "L'evaluazion ie sciche n zogher che va de bujën per mustré su la direzion ulà che dëssa jì la scola" à dit l assessëur Florian Mussner. L'evaluazion dla scoles ne dëssa aldò dl assessëur ala scola ladina nia unì ntendù sciche sistem de cuntrol, ma bën sciche servisc che juda y che lëura ora mpulsc de svilup, de programazion y per svilupé vijions. Tl tëmp che à laurà l Cumité per l'evaluazion iel unì dat ora sies publicazions sun la scola ladina y sun l livel arjont dai sculeies. "Chësta publicazions mostra su te na maniera obietiva che l ie unì fat vares inant" à dit l ntendënt Roland Verra pra l rendicont a Bulsan. La gran mpurtanza che tl mond dla Scola ladina vën data al plurilinguism ie aldò dl ntendënt n spiedl dl bujën dla cumenanza. Cialan de reviers al lëur fat iel danterauter nce unì laudà i vares che ie unic fai per prejenté l sistem scolastich ladin al mond dla scoles tudësces y talianes. Te si relazion finela à l presidënt dl cumité, Lois Ellecosta nce lecurdà la furmazion che ie unida fata per crië te uni scola persones de referimënt al'evaluazion a na maniera che i analiseie internamënter la pertes stersces y dëibles dla singula scola cun l fin de purté dant prupostes.
Nce sce l cumité à lascià si atività, iel tla ntendënza daniëura na persona che se dedichea de plën al'evaluazion dla scoles ladines. Sciche udù danora uniral ntensificà la culaburazion cun l'autra ntendënzes. Te chësc mumënt ie Rosmarie Mussner deberieda cun esperc dl'università, tl lëur de analisé scric de 560 sculeies n cont de si cumpetënzes tla rujeneda nglëija. Per n auter ann iel pona udù danora na publicazion di resultac dl'analisa te cater rujenedes.
Per l daunì se nmagina l assessëur Florian Mussner n servisc de evaluazion per la scoles de duta trëi grupes de rujeneda. La scola ladina dassëssa te chësta vijion avëi na si persona de referimënt y tl medemo tëmp nce l mesun de se cunfrunté cun i autri sistems scolastics. Te chësta pruspetiva vëniel dat mpurtanza ala puscibltà de se giaurì mantenian purempò l'unicità dl sistem ti luesc ladins. "Messon nce vester davierc ai autri, ajache te nosta situazion de mendranza sons massa pitli n cont de cumpëides" à dit Mussner. Do avëi stlut ju l'analisa dla cumpetënzes tla cater rujenedes à l ntendënt nunzià la pruspetiva de slargë ora l'evaluazion nce ala scolina che fej atività de alfabetisazion.
De plu Fotos dla relazion sun la plata facebook „Jonta dla Provinzia de Bulsan".
---
D'autri comunicac stampa sun chësc argumënt
26.01.2012 Sculeies ladins al medemo livel linguistich sciche tudësc y taliani
27.09.2011 Bon resultac PISA per la Scola Ladina
01.06.2011 Scoles ladines unfat bones de rujenedes sciche la tudësces y talianes
12.11.2010 Analisà la cumpetënza de rujenedes tla scoles
09.12.2009 Cumpetënza de rujenedes tl'elementeres ladines
02.02.2009 Analisa di ejams de matura dal 2004 al 2007
05.06.2008 Cumité nuef de evaluazion à metù man si atività
05.03.2008 Cumité provinziel per l'evaluazion dla scoles ladines: numinazion di cumëmbri
as
Galaria dales fotografies
