Atualità
Regolamentaziun nöia por l’evaluaziun dla scora
USP – Le sistem d’evaluaziun dles scores dl Südtirol é gnü metü a jì danü. La Junta provinziala à aprovè na ordinanza che à le fin da garantì y svilupé la cualité dla scora te chëra che al vëgn odü danfora na evaluaziun interna y esterna.
Feter dui agn alalungia él gnü laurè pro la regolamentaziun nöia dl'evaluaziun dl sistem de formaziun dla Provinzia. A dötes les perts interessades - dai dirigënć ai scolars - ti él gnü damanè da fà sües propostes, de chëres che an à tignì cunt aladô dles poscibilitês. Propostes de mudaziun é inće gnüdes portades ite dal Consëi Scolastich Provinzial, che à aprovè la proposta d'ordinamënt ala fin de mà dl 2012. Do avëi laurè ite les propostes de mudaziun à la Junta provinziala aprovè la proposta di trëi assessurs provinziai por la scora. L'ordinamënt va en forza do la publicaziun tl Boletin Ofizial dla Regiun dl decret dl Presidënt dla Provinzia che alda laprò.
L'ordinamënt nü definësc le significat y le fin dl'evaluaziun insciö: L'evaluaziun öga da assiguré y svilupé inant la cualité dl'oferta formativa dla Provinzia. L'evaluaziun vëgn partida sö danter evaluaziun esterna y evaluaziun interna.
L'evaluaziun interna fej pert dla garanzia dla cualité dles direziuns raionales dla scolina y dles scora de carater statal, sciöche inće dles scores profescionales provinziales. Ares ćiara autonomamënter cara che la faziun dla formaziun é y s'evaluëia instësses. Da fà chësc él da adorè na cornisc de cualité obliënta dada dant dal'evaluaziun esterna; implü él da fà n confrunt cun i fins de so model y de so program de formaziun o de scora. Les esperiënzes y les contlujiuns che vëgn da chisc confrunć röia te mosöres por miorè y svilupé i prozesc de formaziun. Implü laôra fora les direziuns raionales dla scolina y les scores n conzet de de plü agn sön le svilup dla cualité, che s'orientëia ala cornisc de cualité nominada dessura. La cornisc de cualité y i standarg de cualité vëgn naôta aprovà dala Junta provinziala. I ćiamps de evaluaziun, la prozedöra, les contlujiuns y les mosöres vëgn lascià alsavëi a döta la comunanza dla scolina y dla scora, y vëgn fissà tl program de formaziun o de scora.
L'evaluaziun esterna vëgn metüda sö tl dagnì ti departimënć por la formaziun (te vigni departimënt por la formaziun vëgnel metü sö n sorvisc d'evaluaziun). Ara integrëia l'evaluaziun interna tres na odüda esterna profescionala, fej le cheder dla situaziun y confrunć sön la cualité y laôra fora propostes de mioramënt. Le sorvisc de evaluaziun laôra dantadöt fora- sön la basa di prinzips fać fora danter i direturs di departimënć por la formaziun - na cornisc de cualité obliënta por les scolines y les scores, sciöche inće por l'ativité dl sorvisc de evaluaziun. Pian ia da na evaluaziun interna ćiara le sorvisc de evaluaziun tan inant che les direziuns raionales dles scolines y les direziuns dles scores à arjunt i fins preodüs tles leges provinziales, tles diretives de cornisc dla Provinzia y ti programs de formaziun y de scora, y mët dant na relaziun por dötes les direziuns dles scolines y dötes les direziuns dles scores, sciöche inće düć i direturs competënć a će di departimënć. Chësta relaziun ti va tl medemo tëmp por scrit ala Junta provinziala.
Le sorvisc d'evaluaziun cöi adöm, analisëia y interpretëia i dać, che va debojëgn por valuté le sistem de formaziun dla Provinzia, valutëia a na moda mirada n valgügn aspeć y elaborëia relaziuns scrites sön i resultać. N ater dovëi dl sorvisc d'evaluaziun é chël de tó pert al plann d'evaluaziun a livel nazional y internazional. Al acompagnëia les direziuns raionales dles scolines y les direziuns dles scores da le realisé, analisëia i resultać importanć por le Südtirol y i publichëia.
usp
