Atualità
La Sezion ladina à metù man
USP - Cun la prima senteda à la Sezion ladina dl Cunsëi scolastich provinziel chisc dis metù man si atività. Tla senteda costituënta ie unì lità doi cumiscions: l cunsëi dl personal nseniant y l cunsëi dl personal diretif y ispetif.
Canche la se trata de majera dezijions per l mond dla scola, vëniel cherdà ite 63 cumëmbri dl Cunsëi scolastich provinziel che lëura ora prupostes y cunsëies per la Jonta provinziela. De setëmber se à chësc cunsëi ancuntà l prim iede te si cumposizion nueva. L'ena passeda, ai 28 de nuvëmber se à nce la sezion ladina de chësc cunsëi ancuntà per l prim iede. La senteda costituenta ie unida tenia dla direzion dla scolines ladines a Urtijëi. Do na ntroduzion dla presidënta Edith Ploner iel nce unì fat la vela de doi cumiscions.
L cunsëi dl personal nseniant à la funzion de tò pruvedimënc disciplineres y sun l stat giuridich dl personal nseniant. Tlo ie l ntendënt Roland Verra unì lità presidënt. Te chësta cumiscion iel pona mo unì lità Michaela Vittur (reprejentanta dla scola elementera), Uberto Valentini (reprejentant dla scola mesana) y Walter Pescosta (reprejentant dla scola auta).
La medema funzions à l Cunsëi dl personal diretif y ispertif canche la se trata de chësta categuria de respunsabli. Nce per chësta cumiscion ie l ntendënt Roland Verra unì lità presidënt. Cun ël ie nce unì litei Edith Ploner (Ispetëura dla scolines) y Bruno Senoner (reprejentant di diretëures).
La sezion ladina dl Cunsëi scolastich provinziel se anconta per cuestions che reverda me la grupa de rujeneda ladina. Chësta vën meneda da Edith Ploner che sarà nce presidënta de dut l Cunsëi scolastich ntan l ann de scola 2015/16. Tl plenum iel deberieda cun la presidënta, 8 reprejentanc ladins: l assessëur ladin Florian Mussner y l ntendënt Roland Verra, Walter Pescosta (scoles autes), Michaela Vittur (scoles elementeres) y Uberto Valentini (scoles mesanes), Ivana Peristi (genitores) y Romeo Costa (sculeies).
Tla sezion ladina fovel d'ansciuda sëuraprò mo unì lità Bruno Senoner (diretëur), Rosmarie Senoner (scolines), Verena Niederegger (nsenianc de religion), Andreas Tomasini (scola prufesciunela), Heinrich Videsott (Chemuns), Evelin Moroder (economia y mond dl lëur), Paul Videsott (Università) y Andrea Tardivo (cësa per i studënc).
Pra la senteda a Urtijëi ie Ivana Peristi, la reprejentanta di genitores, unida liteda vizepresidënta dla Sezion ladina dl Cunsëi scolastich provinziel.
as
